Bjarni Benediktsson var í viðtali í Ísland í dag hjá Sindra Sindrasyni. Þar var greint frá því að börn Bjarna hafi lent í því að illa sé talað um föður þeirra í skólanum. Bjarni var þá spurður hvernig hann bregst við. Bjarni hefur þá sagt við börn sín:
„Þetta er heimurinn. Við erum heppin að búa á þessu landi. Við erum svona í lífskjörum, ef við myndum taka allan heiminn í einu prósentinu sem hefur það best. Þegar börnin mín fara að kvarta undan tilverunni þá segi ég, eigum við að setja hlutina aðeins í samhengi. Eigum við aðeins að ræða það hvernig við höfum það sem fólk.“ Bjarni bætti við:
„Ég tala þá almennt um það hversu gott við höfum það hér á þessu landi. En ég er ekki í því að pakka börnunum mínum inn í bómull. Það mun ekki gera neitt. Fólk mun lenda í átökum í lífinu, á vinnustað, sama hvar þú kemur í lífinu, þú getur alls staðar mætt mótlæti.“
Þá var Bjarni spurður hvort hann vildi sjá börn sín í pólitík. Þeirri spurningu var svarað neitandi en bætti svo við:
„Ef þau kæmu til mín og hérna innra með þeim brynni eldur fyrir því að láta til sín taka í þágu samfélagsins, þá myndi ég styðja þau heilshugar.“
„En ef það væri fyrir vinstri græna, Samfylkinguna eða Pírata?“ spurði Sindri Sindrason og sagði Bjarni það engu máli skipta.
Myndi það engu máli skipta? Spurði Sindri þá. Bjarni svaraði:
„Nei nei, en þá myndi ég þurfa að tala við Þóru og segja henni: „Uppeldið mistókst.“
