Erlend fjárfesting á Íslandi
Á undanförnum árum hefur erlend fjárfesting á Íslandi aukist. Fjölbreytt störf hafa því skapast í ólíkum atvinnugreinum. Á opnum fundi Samtaka atvinnulífsins (SA) í gær var leitast við að svara því hvort erlend fjárfesting á Íslandi væri böl eða blessun. Gera þarf betur því aukin erlend fjárfesting styrkir efnahagslífið og bætir lífskjör landsmanna.
Í erindi sem Ásdís Kristjánsdóttir forstöðumaður efnahagssviðs SA hélt kom fram að a.m.k. sexþúsund og fimm hundruð starfsmenn starfa nú fyrir fyrirtæki á Íslandi sem eru í erlendri eigu. Samt er Ísland eftirbátur grannþjóða. Mikilvægt er að bregðast við og skapa samkeppnishæft og og eftirsóknarvert umhverfi á Íslandi sem getur laðað að erlendar fjárfestingar.
Eftir miklu er að slægjast. Ásdís tók sem dæmi íslenskt fyrirtæki sem flokkast sem erlend fjárfesting. Níutíu krónur af hverri eitthundrað króna veltu verður eftir í landinu. Aðeins tíu krónur fara úr landinu sem arður. Ásdís sagði virðisaukningu af fjárfestingum verða að mestu leyti eftir í formi launa og fjárfestinga; auk kaupa á innlendum aðföngum og greiðslu skatta og opinberra gjalda.
Í umræðum á fundinum kom fram að íslensk höft draga úr tiltrú erlendra fjárfesta á Íslandi. Ekki er eftir neinu að bíða sagði Lilja Alfreðsdóttir alþingismaður. Klára þarf afnám hafta strax. Halldór Benjamín Þorbergsson framkvæmdastjóri SA sagði að bæta þurfi móttökuskilyrði fyrir beina erlenda fjáfestingu á Íslandi.
Á fundinum kom fram að augljós ávinningur er af erlendum fjárfestingum á Íslandi fyrir íslenskt atvinnulíf. Erlend fjárfesting á Íslandi er ekki böl heldur blessun. Hún styrkir stöðu Íslands og bætir lífskjör. En hafa skal hugfast að opið hagkerfi bætir lífskjör. Mikilvægt er að stjórnvöld stigi skrefin til fulls og losi um öll höft. Höft sama í hvaða formi þau eru draga úr erlendri fjárfestingu á Íslandi.
Nánar á www.sa.is
