Björn Leví Gunnarsson, þingmaður Pírata, er ekki bjartsýnn á vegferð ríkisstjórnarinnar er varða samgönguskatta. „ Held að hún endi út í skurði enn og aftur.“
Þetta má lesa í nýjasta pistli Björns Leví sem birtist í Morgunblaðinu í morgun.
„Nýlega kynnti innviðaráðherra áform um gjaldtöku í öllum jarðgöngum landsins ásamt „annarskonar gjaldtöku“ þar sem eldsneytisgjald úreldist fyrr en síðar. Í staðinn eiga að koma „einhverskonar notkunargjöld“,“ segir Björn Leví. Hann segist ekki sjá hvernig ríkisstjórnin ætli að láta dæmið ganga upp.
Meira þurfi að gera fyrir málaflokkinn og að betri heildarsýn þurfi í samgöngumálum. „ Ekki bara fyrir bíla, heldur einnig fyrir fótgangandi, hjólandi, fljúgandi, siglandi, syndandi og hvað annað sem fólki dettur í hug að nota sem samgöngumáta,“ segir Björn Leví meðal annars og heldur áfram:
„ Þegar við erum eins sammála og við getum orðið um heildarsýnina þá þurfum við að ákveða hversu mikið við ætlum að vinna að þeirri heildarsýn í einu. Fyrst þá vitum við hversu miklar tekjur við þurfum að afla til þess að ná þeim markmiðum.“
Björn Leví segir það skipta máli hvernig teknanna er aflað og að sátt þurfi að ríkja um það.
„Ef ríkisstjórnin ætlar bara að pukra um það úti í sínu horni, sín á milli, þá mun það aldrei skila almennum árangri. Til dæmis hefur aldrei verið sátt um að setja veggjöld á öll jarðgöng í landinu og síðast þegar það var rætt fór ríkisstjórnin undan í flæmingi með að kannski væri eðlilegt að undanskilja einhver gömul jarðgöng og einnig jarðgöng sem sameina byggðarkjarna. Nú er aftur sagt „öllum göngum“ og að gjaldið „sé nokkuð hátt, en samt hóflegt“,“ segir Björn Leví sem er ekki bjartsýnn.
Hægt er að lesa pistilinn í heild sinni hér.
