Fagnaðarefni er að frá og með áramótum heyrir embætti sérstaks saksóknara sögunni til.
Þetta segir Sigurður G. Guðjónsson, hæstaréttarlögmaður og verjandi sakamanna sem hafa verið dæmdir í fangelsi eftir rannsókn sérstaks.
Björn Bjarnason, fyrrum dómsmálaráðherra, fær hvöss skeyti frá lögmanninum en Sigurður ræðir tímamótin í færslu á eigin fésbók:
„Dóms- og mannréttindaráðherrann fyrrverandi vildi tryggja að réttu mennirnir fengju makleg málagjöld - banka- og viðskiptamenn. Til að auðvelda það bjó dómsmálaráðherrann svo um hnútana í lögum um embætti sérstaks saksóknara að uppljóstrarar, það er þeir sem bæru sakir á aðra og hjálpuðu til við rannsókn embættis sérstaks saksóknar, slyppu við saksókn, þó líkur væri á brotum þeirra sjálfra. Í dag veit enginn hve margir gátu með uppljóstrun firrt sig refsiábyrgð eða hve alvarleg brot þeirra voru.
Réttarfarsnefnd sem vann frumvarp sem varð að lögum nr. 47/2015, en með þeim lögum var embætti sérstaks saksóknara lagt af og embætti héraðssaksóknara komið á laggirnar, treysti sér ekki að hafa uppljóstrunarákvæði Björns Bjarnasonar áfram í gildi.
Er þetta mikil réttarbót og færir sakamálaréttarfar á Íslandi vonandi aftur í það horf, að sérhver maður telst saklaus uns ákæruvaldinu tekst að sanna sekt og að allur vafi um sekt verði skýrður sakborningi í hag,“ skrifar lögmaðurinn.
Hann hnykkir svo á skoðun sinni á Birni og þeim sem eftir komu með eftirfarandi:
„Björns Bjarnasonar verður í sögu laganáms á Íslandi minnst fyrir það eitt að afnema mannréttindi tiltekins hóps; hóps sem honum og Hrunstjórninni var í mun að koma höggi á. Það sem dómsmálaráðherrann sá ekki fyrir var að framkvæmd laganna yrði hjá annarri stjórn; stjórn sem vildi gjörbylta íslensku samfélagi og gaf álíka lítinn gaum að réttindum þeirra, sem Björn Bjarnason taldi bera refsiábyrgð á hruninu haustið 2008.“
