Björgunarsveitir eru enn að störfum á sunnaverðum Vestfjörðum og Norðurlandi en í Skagafirði er verið að reyna að bjarga þaki af bóndabæ sem er að fjúka. Alls eru útköllin orðin 350 til 360 talsins og talsvert fjárhagslegt tjón.
Jónas Guðmundsson upplýsingafulltrúi Slysvarnarfélagsins Landsbjargar, segir í samtali við fréttavef Morgunblaðsins að um sjö hundruð björgunarsveitarmenn hafi tekið þátt í aðgerðum í gær og í nótt en útlit er fyrir að björgunarsveitarmenn verði að störfum til hádegis fyrir norðan og á Vestfjörðum en þar er bálhvasst.
Á fréttavefnum segir aukinheldur að á höfuðborgarsvæðinu hafi síðustu fimmtíu björgunarsveitarmennirnir farið til síns heima um sjö leytið í morgun.
Eins og fram kemur í öðrum fréttum Hringbrautar, tengdum óveðrinu, er ljóst að fjárhagslegt tjón er talvert en heil þök fuku á einhverjum stöðum, gámur með búslóð tók flugið og bátar sukku. Við Háaleitisbraut splundraðist strætóskýli og í Vestmannaeyjum tók þak af íbúðarhúsi við Smáragötu og lenti í heilu lagi á lóð rétt hjá, svo fátt eitt sé nefnt af útköllum björgunarsveitarfólks.
