Bjarni Benediktsson, fjármálaráðherra segir ekkert því til fyrirstöðu að ríkið selji Íslandspóst þegar búið sé að breyta lögum um starfsemi fyrirtækisins. Þetta kemur fram í viðtalið við hann í Fréttablaðinu. Úttekt sem Ríkisendurskoðandi var beðin um að gera á rekstri Íslandspósts, að beiðni fjárlaganefndar Alþingis, sýndi að uppsafnað tap á árunum 2013 til 2018 hafi numið alls 246 milljónum króna. Þurfti Íslandspóstur að leita til ríkisins og biðja um fjárstuðning þar sem viðskiptabanki Íslandspósts var búinn að loka á öll frekar lánaviðskipti við fyrirtækið. Ríkið lánaði Íslandspósti 1.500 milljónir króna árið 2018.
„Hins vegar held ég að það hafi ekki verið aðstæður til þess undanfarin misseri eða ár að hefja undirbúning að slíkri sölu vegna þess hvernig reksturinn hefur gengið,” segir Bjarni
Það kemur meðal annars fram í úttekt Ríkisendurskoðanda að mikill samdráttur hafi verið á bréfasendingum ásamt því að pakkasendingar frá útlöndum hafi verið kostnaðarsamar fyrir Íslandspóst. Ríkisendurskoðandi bendir þó á að fjárfestingar fyrirtækisins hafi verið allt of miklar árið 2018 sé tekið tillit til greiðslugetu fyrirtækisins. Í úttektinni kemur fram að Íslandspóstur geti gengið mun lengra í hagræðingu innan fyrirtækisins en það hefur gert hingað til.
Svanhildur Hólm Valsdóttir, aðstoðarmaður fjármálaráðherra, sat í stjórn Íslandspósts frá árinu 2014 þar til hún hætti á þessu ári sem varaformaður stjórnar fyrirtækisins. Vekur það furðu hjá mörgum að á meðan aðstoðarmaður fjármálaráðherra hafi setið í stjórn Íslandspósts hafi fjármálaráðuneytið sjálft ítrekað kallað eftir upplýsingum um rekstrarstöðu Íslandspósts, en ekki fengið frá stjórn félagsins.
