Bjarni Benediktsson, fjármála- og efnahagsráðherra, er ráðherrann sem var í 40 til 50 manna samkvæmi í sal í miðbæ Reykjavíkur í gærkvöldi. Þetta herma heimildir Fréttablaðsins. Hvorki hefur náðst í Bjarna eða aðstoðarmenn hans í dag.
Í dagbók lögreglu í morgun kom fram að ráðherra hafi verið meðal gesta í hátt í fimmtíu manna samkvæmi sem var leyst upp um klukkan hálf ellefu í gærkvöldi.
Þar kemur fram að veitingarekstur sé í umræddum sal sem falli undir svokallaðan flokk II og því ætti salurinn að hafa verið lokaður á þeim tíma sem samkvæmið var stöðvað. „Í ljós kom að á milli 40-50 gestir voru samankomin í salnum, þar á meðal einn háttvirtur ráðherra í ríkisstjórn Íslands,“ segir í dagbók lögreglu. „Töluverð ölvun var í samkvæminu og voru flestir gestanna með áfengi við hönd. Lögreglumenn veittu athygli að enginn gestanna var með andlitsgrímur fyrir andliti. Lögreglumenn sögðu að nánast hvergi voru fjarlægðartakmörk virt.“
