Stjórnendur 300 fyrirtækja birtu áskorun í dagblöðum í vikunni þar sem þeir skoruðu á Alþingi að lækka tryggingagjaldið. Gjaldið nemur 7,5% af launum hvers starfsmanns og rennur meðal annars til greiðslu atvinnuleysisbóta. Stjórnendurnir telja það vera 25 milljörðum króna of hátt í ljósi þess að atvinnuleysi hafi minnkað hratt en gjaldið sé hins vegar enn í hæstu hæðum. Gjaldið komi einna harðast niður á litlum og meðalstórum fyrirtækjum þar sem flest ný störf verða til. Bjarni Benediktsson fjármálaráðherra sagði hins vegar að loknum ríkisstjórnarfundi í gær að gjaldið verði ekki lækkað um áramótin.
\"Við vorum að gera ráð fyrir því í ríkisfjármálaáætluninni sem ég lagði fyrir þingið í vor að við myndum forgangsraða í þágu þess að lækka tryggingagjaldið. En niðurstaðan eftir samráð út af kjaramálum varð sú að við lögðum frekar áherslu á lækkun tekjuskatts fyrir launþegana. Þetta var allt í góðu samráði í vor og ég vænti þess að menn kannist við það að það gerðist ekki án samráðs að við tefldum tryggingagjaldinu aftar í forgangsröðuninni. Við þær aðstæður sem eru uppi núna tel ég ekki svigrúm til þess að fara í breytingar á borð við þær sem verið er að fara fram á um áramótin,\" er haft eftir ráðherranum á fréttavef RÚV núna um helgina.
Hann er þar spurður hvort gjaldið sé ekki íþyngjandu fyrir fyrirtæki: \"Ég held að það sem sé fyrst og fremst íþyngjandi fyrir fyrirtæki er þegar laun hækka um 7,8 eða 9 prósent á hverju ári. Það er óskaplega einkennilegt ef þeir sem geta hækkað laun um 7 til 9 prósent á ári koma og segja „heyrðu það er tryggingagjaldið, að það skuli ekki lækka um 1%, það er það sem er að kæfa okkur“. Þetta hangir auðvitað saman. Tryggingagjaldið er að leggjast á launakostnað.“
Vefurinn spyr ráðherrann að auki hvort ekki hafi verið ályktað um lækkun gjaldsins á landsfundi Sjálfstæðisflokksins nýverip og raunar líka í Salek-viðræðum aðila vinnumarkaðarins: \"Jú við erum þeirrar skoðunar að það þurfi að gæta að álögum á atvinnulífið til þess að fólk geti ráðist í fjárfestingar og ráðið fólk til starfa. En þetta verður ekki slitið úr samhengi við kjaraþróun í landinu almennt. Ef menn eru að fara í gegnum kjaralotu þar sem á að taka út 30% launahækkun er eitthvað skrítið ef næsta skref er að segja „heyrðu það er tryggingagjaldið maður, það er það sem er aðalvandamálið“. Nei, vandamálið er launakostnaðurinn í heildina séð,“ segir Bjarni á vef RÚV.
