Bjarney S. Annelsdóttir hefur verið skipuð yfirlögregluþjónn hjá embætti lögreglustjórans á Suðurnesjum. Þar með er hún fyrsta konan til þess að gegna embætti yfirlögregluþjóns á Íslandi. Bjarney mun leiða rannsóknardeild og almenna deild embættis lögreglustjórans á Suðurnesjum.
Frá þessu er greint í fréttatilkynningu frá lögreglustjóranum á Suðurnesjum.
Í tilkynningunni segir að Bjarney hafi fyrst hafið störf sem afleysingarmaður í lögreglunni á Keflavíkurflugvelli árið 1999. Hún útskrifaðist úr Lögregluskóla ríkisins árið 2003.
Bjarney starfaði hjá lögreglunni í Hafnarfirði árið 2004 og í í Keflavík árið 2005 áður en hún hóf störf við kennslu í Lögregluskólanum árið 2007. Þar starfaði hún til ársins 2013 þegar hún varð aðalvarðstjóri hjá lögreglunni á Suðurnesjum. Frá áramótum 2017 og 2018 var Bjarney settur aðstoðaryfirlögregluþjónn hjá lögreglunni á Suðurnesjum.
Hún var síðan skipuð yfirlögregluþjónn lögreglunnar á Suðurnesjum frá 15. apríl á þessu ári.
Bjarney hefur víðtæka menntun að baki, en auk þess að hafa útskrifast úr Lögregluskóla ríkisins árið 2003 lauk hún rekstrarfræði frá Bifröst árið 2002, viðskiptafræði BSc frá Bifröst árið 2006 og M.ed gráðu í íþrótta- og heilsufræði frá HÍ árið 2016. Þá hefur hún lokið fjölda starfstengdra námskeiða.
