„Vísindamenn hafa fært okkur heim sanninn um að losun gróðurhúsalofttegunda vegna lífshátta margra jarðarbúa hefur valdið ofhlýnun jarðar og stefnir í að hlutar heimsins verði óbyggilegir,“ sagði Agnes Sigurðardóttir, biskup Íslands í páskaprédikun sinni sem hún flutti í dag.
Prédikunina flutti hún fyrir tómri Dómkirkju vegna samkomubannsins. „Þessir páskar eru öðruvísi en flestir aðrir. Fólk hópast ekki saman til að renna sér á skíðum eða hitta ættingja og vini. Nú hefur það tekist sem kannski engum hefði dottið í hug, að fyrirmælum er hlýtt. Við stöndum frammi fyrir ógn sem hefur tekið líf fjölda fólks, veikt aðra og lagt efnahagskerfi heimsins á hliðina. Þegar lífinu og lífsgrundvellinum er ógnað þá gildir samstaðan,“ sagði hún.
Hún ræddi þá samband loftslagsmála og veirunnar og sagði að viðbrögð við faraldrinum sýndu að með samtakamætti og einbeittum vilja væri hægt að ná þeim markmiðum sem sett voru með Parísarsamkomulaginu.
„En svo hryggilegt sem það er þá hefur veiran skæða orðið til þess að stopp hefur verið sett á daglegt líf jarðarbúa og á sama tíma berast þær gleðilegu fréttir að íbúar í Punjabhéraði, nyrst á Indlandi, sjái nú loks aftur til Himalajafjalla sem þeir hafa ekki séð síðustu þrjátíu árin vegna mengunar. Að gervihnattarmyndir sýni að mikið hafi dregið úr loftmengun í Kína og að síkin í Feneyjum séu aftur orðin tær.
Við höfum verið að stefna í þessa áttina, að minnka mengun og auka loftgæði, en það hefur gengið allt of hægt. En þessar fréttir sýna, svo ekki verður um villst, að með samtakamætti og einbeittum vilja er hægt að ná því markmiði sem samþykkt var á loftslagsráðstefnunni í París árið 2015 að draga úr losun gróðurhúsalofttegunda þannig að hnattræn hlýnun verði ekki meiri en tvær gráður.“
