Birgitta: enginn vafi að um nauðgun sé að ræða

Julian Assange, stofnandi WikiLeaks, situr nú í fangelsi eftir að hafa verið dreginn út úr sendiráði Ekvador í Lundúnum fyrir rúmum mánuði og handtekinn. Þann 1. maí var hann svo dæmdur í 50 vikna fangelsi fyrir að brjóta gegn skilyrðum og svíkjast undan tryggingu. Assange sætir nú einnig rannsókn í Svíþjóð vegna ásakana um kynferðisbrot í garð tveggja kvenna. Málið var fellt niður fyrir tveimur árum en var nýverið verið tekið upp að nýju.

„Það er mál í gangi sem verið er að taka upp aftur í Sví­þjóð sem hefur farið alveg gríðar­lega í taugarnar á mér, og ég skil ekki fólk eins og Kristinn Hrafns­son, að voga sér að segja að þetta sé ekki kyn­ferðis­brot,“ sagði Birgitta Jóns­dóttir, fyrr­verandi þing­maður Pírata, um málið í Harmageddon á X-977 í morgun. Birgitta starfaði á árum áður fyrir WikiLeaks og þekkir Assange.

Níu ár eru frá því að fyrstu á­sakanirnar á hendur Ass­an­ge komu fram og sagðist Kristinn Hrafnsson, ritstjóri WikiLeaks og talsmaður Assange, í við­tali hafa hvatt hann til þess að flýja land á sínum tíma. „Ég hef fylgst með þessu Sví­þjóðar­máli frá upp­hafi, þessu meinta nauðgunar­máli sem er engin nauðgun,“ sagði Kristinn í Silfrinu á RÚV í apríl.

Birgitta sagði í Harmageddon að það væri bæði ó­á­byrgt af Kristni að hvetja Ass­an­ge til þess að flýja land og að full­yrða að ekki hafi verið um nauðgun að ræða. Hún sagðist per­sónu­lega hafa rætt við Ass­an­ge og konurnar í Svíþjóð þegar á­sakanirnar komu fram.

„Ég hef kynnt mér þetta mál mjög mikið í mjög mörg ár. Þetta eru ekki einu konurnar sem Assange hefur komið svona fram við. Önnur þeirra var sofandi og var búin að segja við hann ítrekað: „Ég vil ekki stunda ó­varið kyn­líf.“ Hún vaknar og hann er með fokking titt­linginn á sér inni í henni og hún spyr: „Hvað ertu með á þér?“ Og hann segir: „Þig.“ Hvað er það?“ sagði Birgitta.

Hún segir engan vafa leika á því að þarna sé um að ræða nauðgun. „Hér á Ís­landi væri þetta líka skil­greint sem nauðgun. Ef þú vilt ekki á­kveðna tegund af kyn­lífi, ef hann myndi stinga titt­lingnum á sér inn í rass­gatið á henni eða eitt­hvað. Það er bara nauðgun og ekkert annað,“ sagði hún.

Birgittu þykir þessar konur eiga skilið réttlæti eins og aðrir. „Ég vil að þessar konur fái sinn dag fyrir dóm­stólum. Ég get sagt að þetta, sem er skil­greint sem nauðgun, að konum sé stillt upp eins og þær séu ein­hverjar CIA-hórur, finnst mér fyrir neðan allar hellur.“