Áhugaverðar umræður hafa skapast á samfélagsmiðlum eftir að fréttir bárust í gær um þingflokksskipti Birgis Þórarinssonar úr Miðflokknum í Sjálfstæðisflokkinn. Hann segir Klaustursmálið hér um árið hafi haft áhrif á flokksskiptin. Fólk tekur misvel í ákvörðun hans og segja um svik við kjósendur að ræða.
Baldur Borgþórsson varaborgarfulltrúi Miðflokksins skrifar í færslu á Facebook „Nú er bleik brugðið kæri vinur. Finnst þér sómi að framkomu Birgis og Ernu gagnvart flokkssystkinum sínum sem þau nýttu til að koma sér inn á þing til þess eins að senda þeim þessar köldu kveðjur strax að loknum kosningum?
Og það áður en þing er sett? Slík framkoma er engum til sóma og enn síður ástæða til fagnaðarláta. Kvislingar er það fyrsta sem kom upp í minn huga við þessar fréttir.“
Ummælin dynja á færslu hans með alls kyns skoðunum þar á meðal Páll Valur Björnsson, fyrrverandi þingmaður, „þetta Íslandsmet í svikum við kjósendur. Eflaust miklu fleiri sem tjá sig annars staðar.“
Karl Garðarsson fyrrverandi þingamaður Framsóknarflokksins skrifar einnig um málið í færslu á Facebook þar sem hann segir engan skort vera á pólitískum óheiðarleika. Ákvörðun Birgis Þórarinssonar að yfirgefa Miðflokkinn og ganga til liðs við Sjálfstæðisflokkinn, hálfum mánuði eftir kosningar hljóti að jaðra við Íslandsmet, skrifar hann.
„Það er svo sem ekkert nýtt að þingmenn skipti um flokk. Birgir var hins vegar greinilega búinn að ákveða þetta fyrir kosningar, nýtir sér Miðflokkinn og kjósendur hans til að komast inn á þing, en yfirgefur skútuna strax og markmiðinu er náð. Subbulegra verður það vart. Sorglegt að sjá vini mína í Sjálfstæðisflokknum fagna þessu á samfélagsmiðlum. Við eigum aldrei að gleðjast yfir óheiðarleika.“
