Hannes Hómsteinn Gissurarson bar í viðtali í gær saman fjölda nóbelsverðlauna sem hefðu fallið til annars vegar gyðinga og hins vegar araba í umræðu um útlendingamál, hryðjuverk í París og ummæli forseta Íslands í gær.
Ummælin fellu á Útvarpi Sögu og vöktu hörð viðbrögð á samfélagsmiðlum í gærkvöld. Þar var prófessorinn m.a. vændur um kynþáttahyggju. Verðlaunin séu vestrænnar gerðar og miðist við menningarheim sem lengst af hafi verið lokaður aröbum.
Hannes sagðist í viðtalinu sammála forseta Íslands, Ólafi Ragnari Grímssyni, um að efla þurfi lögreglu og landamæraeftirlit í kjölfar árásanna í París. Hannes sagðist furða sig á því að samkennarar hans í stjórnmálafræðinni veittust nú að forsetanum fyrir varnaðarorðin og vísaði þar til orða Baldurs Þórhallssonar, prófessors í stjórnmálafræði við Háskóla Íslands, sem segir ummæli forsetans hafa leitt til sundrungar í samfélaginu frekar en sameiningar.
Á vef Útvarps Sögu segir að Hannes hafi í viðtalinu verið spurður út í hugsanleg áhrif flóttamannastraumsins á velferðarkerfin í Evrópu og þá ekki síst í ljósi þess að til dæmis íslenska og þýska þjóðin væru að eldast mjög hratt.
„Hannes svaraði því til að lausnin á þeim vanda væri fólgin í því að flytja inn vinnuafl en þá þyrfti að gæta þess að þeir sem settust að í Evrópu væru tilbúnir til þess að aðlagast samfélaginu. Hann sagði óviðunnandi að innflytjendur stofnuðu ríki í ríkinu, eins og öfgamúslimar hefðu tilhneigingu til. Þeir sem hati okkur og vestræna menningu hljóti í það minnsta að geta flutt frá Vesturlöndum.“
