Stór hluti heimsbyggðarinnar hefur fyllst undrun, sorg og reiði eftir að lögregla í Chicaco í Bandaríkjunum birti myndband sem tekið var úr lögreglubíl.
Þar sést hvernig 17 ára unglingur með dökkan hörundslit er skotinn sextán skotum af lögreglumanni úti á götu. Niðurstaðan er að lögreglumaðurinn verði ákærður fyrir morð af ásettu ráði. Hann heitir Jason Van Dyke.
Sjá má myndband af þessum skelfilega atburði hér en eins og fram kemur hjá fréttaþul CNN getur það að horfa á myndbandið, sem farið hefur í dreifingu á youtube, haft mjög truflandi áhrif á áhorfendur, einkum viðkvæmt fólk.
Margar rannsóknir sýna að lögreglumenn í Bandaríkjunum bregðast við af meira ofbeldi þegar svart fólk á í hlut en hvítt. Lögmaður fjölskyldu myrta drengsins, Laquan McDonald, segir að unglingurinn hafi verið hræddur og þess vegna hafi hann veifað hnífi þegar lögregla fylgdist með honum.
Ekki verður séð á myndbandinu að almannaógn stafi af drengnum.
