Eitt stærsta álitamál undanfarin misseri er starfsemi laxeldisstöðva í sjó við landið. Á stuttum tíma hefur eldisstöðvum fjölgað og þær stækkað og dæmi eru um að frjór eldislax hafi fyrir slysni sloppið úr kvíunum. Landssamband veiðifélaga kærði, svo dæmi sé tekið, til lögreglu slysasleppingar í byrjun árs. Slysasleppingar og mengun er mikið rætt og möguleg erfðablöndun og laxalúsasmit. Byggðalög um landið, líkt og í Ísafjarðardjúpi sækjast eftir leyfum til Laxeldis í sjó.
Nýlega ógilti úrskurðarnefnd umhverfis-og auðlindamála þó starfsleyfi fyrir sjókvíaeldi í Ísafjarðardjúpi upp á 6.800 tonn.
Einar K. Guðfinnsson, formaður Landssambands fiskeldisstöðva og Óttar Yngvason, hæstarréttarlögmaður frá Náttúruverndarfélaginu Laxinn lifir mæta á Þjóðbraut í kvöld.
„Það er auðvitað bakslag þegar við fáum það í hausinn að áhættumatið segi okkur að ekkert eldi verði í djúpinu og miklu minna eldi á Austfjörðum heldur en menn höfðu talað um“, segir Einar K. Guðfinnsson, formaður Landssambands fiskeldisstöðva í viðtali á Þjóðbraut í kvöld og vísar í áhættumat Hafrannsóknarstofnunar. Mat Hafró kemur fram í nýrri skýrslu starfshóps sjávarútvegsráðherra um stefnumörkun í fiskeldi sem kynnt var í gær.
„Það hefur ekkert verið að gerast í þessari uppbyggingu“, segir Einar enn fremur um laxeldið í sjónum og að hann vilji sjá að nú verði leyfi gefin út eins og væntingar hafi verið til.
Óttar segir leyfis og eftirlitsstofnanir nú fyrst beita sér samkvæmt lögum: „Þegar andstaðan við stóra eldinu jókst sem byrjaði fyrir svona einu og hálfu, tveimur árum, þá loksins fóru stofnanirnar sem um er að ræða með leyfaútgáfunni, þá voru þær neyddar til þess að fara ofaní málin“, segir Óttar og vísar þar til Skipulagsstofnunar, Umhverfisstofnunar og Matvælastofnunar.
„Þessi andstaða og leiðbeiningar til þessara stofnana hafa leitt til þess að fersta frágangi leyfa. Og nú er farið að ógilda leyfi því stofnanir hafa ekki staðið sig í stykkinu“, segir Óttar enn fremur og vísar í fyrstu grein fiskeldislaga sem hann segir stofnanirnar ekki hafa farið eftir hingað til.
Allt stefnir í framleiðslu eldislax upp á tíu þúsund tonn á þessu ári sem er meira en í fyrra.
Einungis er heimilt að ala laxfiska í sjóvkíum á Vestjörðum, Austfjörðum og í Eyjafirði.
