Eygló Harðardóttir velferðarráðherra gerir staðfastlega ráð fyrir því að rætt verði við Akureyri fyrst sveitarfélaga varðandi viðtöku flóttamanna. Þetta kemur fram í Morgunblaðinu í dag.
„Við viljum gjarnan ræða fyrst við Akureyri. Það var það sveitarfélag sem steig fyrst fram í sumar og sýndi ákveðið frumkvæði í því að taka á móti flóttamönnum og við höfum heyrt það að Akureyringar séu þegar byrjaðir að undirbúa sig,“ hefur mbl.is eftir Eygló.
Logi Már Einarsson, oddviti samfylkingarmanna í bæjarstjórn Akureyrar, segir í fréttaviðtali við Hringbraut að hann fagni ummælum velferðarráðherra:
„Við erum að mörgu leyti ákjósanlegt samfélag til að taka a móti nýjum íbúum. Ég er sannfærður um að þetta mun leiða til þess að samfélagið okkar verður enn skemmtilegra en áður. Ég sé tækifæri í þessu á sama tíma og við þurfum að rækta skyldur okkar gagnvart öðrum jarðarbúum.“
