Nýr búvörusamningur til tíu ára gæti verið á við þrefalda Icesave-skuldbindingu.
Á þetta bendir Morgunblaðið og vitnar til Finns Árnasonar, forstjóra Haga, sem ritaði grein í áramótablað Viskiptablaðsins.
Lengd samningsins bindur auk þess hendur næstu tveggja ríkisstjórna við fjárlagagerð. Finnur segir eðlilegt að fram fari þjóðaratkvæðagreiðsla um nýjan 180 milljarða króna búvörusamning.
Unnið er að nýjum búvörusamningi við bændur sem á að taka við af núverandi samningum sem renna út á næstu tveimur til þremur árum. Stefnt er að því að gera einn rammasamningi fyrir allan landbúnaðinn með undirsamningum fyrir einstakar búgreinar.
Samkvæmt skýrslum OECD nemur stuðningur neytenda við landbúnaðarkerfið á Íslandi um átján milljörðum árlega. Sérhagsmunaaðilar ræða nú um nýjan samning til tíu ára án þess að neytendur, sem greiði fyrir samninginn, eigi aðild að þeim viðræðum, eftir því sem fram kemur í skrifum Finns.
