Guðmundur Baldvin Guðmundsson, skrifstofustjóri hjá Stapa lífeyrissjóði, er nú starfandi staðgengill framkvæmdastjóra eftir að Kári Arnór Kárason, fyrrverandi framkvæmdastjóri, hætti störfum á laugardaginn. Fram kom í Kastljósi í gærkvöld að Kári Arnór var viðriðinn tvö félög í aflandsskjóli og fékk há lán til umsýslu erlendis frá Kaupþingi líkt og fleiri valdir viðskiptamenn hér á landi. Strangar reglur gilda um viðskiptaumsvif forstjóra lífeyrissjóða hér á landi.
Stjórn sjóðsins fundar í vikunni og mun þá taka ákvörðun um framhaldið.
Í yfirlýsingu frá Kára á laugardag sagði að hann teldi það starfi sjóðsins fyrir bestu að hann stigi til hliðar.
Guðmundur Baldvin er oddviti framsóknarmanna á Akureyri og annar tveggja bæjarfulltrúa Framsóknarflokksins í bæjarstjórn á Akureyri. Ekki eru greidd full laun fyrir setu í bæjarstjórn á Akureyri.
