„axlirnar á honum skókust. hann grét með ekka­­sogum“

Sif Sig­mars­dóttir skýtur föstum skotum að Há­skóla Ís­lands, Rauða krossinum, Slysa­varnar­fé­laginu Lands­björg og SÁÁ í ein­lægum pistli sem birtist í Frétta­blaðinu í dag, þar sem hún segir frá því sem hún varð vitni að grátandi manni við spila­kassa í um­ferðar­mið­stöðinni á BSÍ.

Pistilinn hefur Sif á því að segja frá erfiðri ferða­sögu fjöl­skyldunnar þegar hún kom heim til Ís­lands frá London fyrir jólin. Segir hún frá því hvernig taska fjöl­skyldunnar með öllum jóla­gjöfunum og jóla­fötum varð eftir í London.

„Á þriðja degi í sömu fötum fengum við sms skila­boð. Dýrð sé Guði í upp­hæðum! Taskan var komin á BSÍ. Í víga­hug arkaði ég inn á Um­ferðar­mið­stöðina stað­ráðin í að segja ein­hverjum til syndanna. Var Icelandair að reyna að eyði-leggja jólin? Vissi fyrir­tækið ekki að það eru mann­réttindi að þurfa ekki að vera í sömu nær­buxum þrjá daga í röð? Skyndi-lega heyrði ég hljóð, ein­hvers konar ýlfur eins og frá særðu dýri. Ég leit yfir öxlina og kom auga á lítið hliðar­her­bergi. Af ó­for­betran­legri hnýsni gægðist ég inn.“

Því næst segir hún frá því sem þar fyrir augu bar:

„Að­eins einn maður var í her­berginu sem var fullt af spila­­kössum. Hann sat á­lútur á stól við einn kassann. Axlirnar á honum skókust. Hann grét með ekka­­sogum. Ég snerist á hæli og skjögraði í átt að tösku­­geymslunni. Ég sótti ferða­­töskuna en skammaði engan því úr mér var allur vindur. Hver var þessi maður? Af hverju var hann að gráta? Hvað hafði hann tapað miklu í spila­­kassanum? Átti hann ekki lengur fyrir jóla­­­gjöfum handa börnunum sínum?“

Hún segir því næst að allt hafi verið á floti í töskunni. Harmur mannsins sem grét við spila­kassann hafi hins vegar fylgt sér.

„Það er vægt til orða tekið að kalla það hræsni þegar sam­tök sem kenna sig við góð­­gerðar­­störf og upp­­­lýsingu gera sér fíkn fólks að fé­­þúfu. Há­­skóli Ís­lands, Rauði krossinn, Slysa­varna­­fé­lagið Lands­björg og SÁÁ; þið berið á­byrgð á böli mannsins sem grét við spila­­kassann á BSÍ fyrir jólin. Finnst ykkur það í lagi?“