Ólafur Jón Sívertsen bendir á það í nýjasta pistli sínum á hringbraut.is að kjarasamningar launafólks feli í sér auknar skatttekjur ríkisins þrátt fyrir loforð um skattalækkanir. Hann segir að sjálfsögðu aukist tekjur opinberra aðila vegna hærri launa.
Ólafur Jón segir ríkisstjórnina gera nú örvæntingarfulla tilraun til að freista þess að rétta hlut sinn með aðkomu að kjarasamningunum. Lofað hafi verið skattalækkunum upp á 9 til 11 milljarða króna á ári.
„Hins vegar er hvergi minnst á þær auknu skatttekjur sem ríki og sveitarfélög fá vegna þeirrar launahækkunar sem samið var um og taka gildi frá 1. mai sl. Að sjálfsögðu aukast tekjur opinberra aðila vegna hærri launa. Fróðir menn telja að sú aukning skatttekja sem af launahækkunum leiðir sé meiri heldur en lækkun skatta sem boðuð er. Auk þess byrja hærri skattar að koma inn þegar í næsta mánuði en ríkisstjórnin lofar lækkun skatta á næsta ári vegna brottfalls milliþreps í tekjuskatti. Ríkið er því ekki að spila út neinum lækkunum skatta, heldur fá meira í sinn hlut þegar allt er talið," segir Ólafur.
