Heiða Kristín Helgadóttir, sem þykir líkleg til að blanda sér í formannsslaginn í Bjartri framtíð, segist vel geta starfað áfram með Guðmundi Steingrímssyni innan þingflokks Bjartrar framtíðar, þrátt fyrir það sem á undan er gengið.
Gagnrýni Heiðu Kristínar vóg þungt í atburðarás undanfarna daga. Hún sagðist í viðtali við Kjarnann ekki ætla að taka þingsæti Bjartar Ólafsdóttur, sem er á leiðinni í fæðingarorlof og gagnrýndi um leið harðlega hvernig flokknum hafði verið stjórnað undir forystu Guðmundar. Fram að því hafði fylgi flokksins hríðfallið í skoðanakönnunum, en innanflokksátökin höfðu fram að því ekki verið á yfirborðinu.
Í samantekt Eyjunnar um innanflokksátökin í dag segir að ekki hafi þrýstingurinn minnkað á Guðmund þegar Heiða Kristín sagði í Vikulokunum á Rás 1 að hún væri tilbúin til að taka við formannsembættinu í flokknum. Guðmundur hafi svarað með því að leggja til að æðstu embættum flokksins yrði róterað á milli fólks, hugmynd sem hlaut misjafnar undirtektir.
Það var svo i gær sem tilkynnt var að bæði Guðmundur og þingflokksformaðurinn Róbert Marshall hefðu ákveðið að stíga til hliðar úr sínum embættum innan flokksins. Við val á eftirmanni hefur nafn Bryndísar Pétursdóttur verið nefnt, en nær öruggt má telja að Heiða Kristín blandi sér í slaginn. Í það minnsta hefur hún skipt um skoðun og ætlar að taka þingsæti Bjartar sem bendir til þess að hún ætli sér að klífa til metorða innan flokksins.
Því er haldið á lofti að innan Bjartrar framtíðar takist á tveir armar, annars vegar fylgismenn Guðmundar og Róberts og hins vegar sá armur sem kom úr Besta flokknum í borginni, en fylgismönnum þess síðarnefnda þykir núverandi forysta ekki hafa haldið í þau gildi sem það framboð stóð fyrir og að flokkurinn hefði yfir sér áru hefðbundins stjórnarmálaflokks. Það endurspeglaðist best í því að fyrr á þessu kjörtímabili skrifaði Jón Gnarr grein í Fréttablaðið þar sem hann skar á öll tengsl við Bjarta framtíð.
Ljóst er að nýs formanns bíður mikið verk. Bæði þarf að hífa upp fylgi flokksins sem nálgast óðfluga pilsner-styrkleika og sjá þarf til þess að atburðir undanfarinna vikna skilji ekki eftir opið sár.
Heiða Kristín segir í viðtali við mbl.is að nú þegar hafi ákveðin hreinsun átt sér stað innan flokksins, bæði í orði og borði. Vísar hún í þá ákvörðun Guðmundar og Róberts að stíga til hliðar: \"Þetta snýst ekkert um persónulega óvild mína gagnvart Guðmundi. Hann hefur tekið að sér ákveðin embætti og gegna ákveðnu forystuhlutverki í því og mér fannst það vera frekar fullreynt. Við erum fullfær um að geta átt ágætis samskipti og laus við dramatík. Ég get tekið að mér að vera leiðinleg, það er ekkert mál. Það þarf alltaf einhver að vera í því,\" segir Heiða Kristín við mbl.is.
