Ástandið verra en í verkfallinu

\"Þetta er verra ástand en var í verk­fall­inu,“ seg­ir Katrín Sig­urðardótt­ir, formaður fé­lags geisla­fræðinga um aðstæður á Lands­spít­ala en í dag taka upp­sagn­ir 18 geisla­fræðinga á spít­al­an­um gildi sem er þriðjungur starf­andi geisla­fræðinga við spít­al­ann.

Katrín er í viðtali við mbl.is um vanda spítalans í dag og minnir á að í verkfallinu hafi verið hægt að kalla fólk inn á und­anþágu og það hafi verið gert í miklum mæli, en fólk sem sé hætt störfum verði vitaskuld ekki kallað til starfa. Hún seg­ir að vel sé hægt að leysa deil­una sé vilji fyr­ir hendi en að svo virðist ekki vera eins og stend­ur þar sem eng­ar viðræður séu milli fé­lags­ins og Land­spít­al­ans um málið sem stend­ur: \"Það er ekki einu sinni verið að tala við okk­ur. Það er ekk­ert verið að tala sam­an í dag og ef ekki er rætt við okk­ur mun lítið ger­ast.“

Katrín segir ástandið vera sorglegt: \"Það var nú bara hringt hingað frá Nor­egi og við beðin um að benda þeim á fólkið en það sem er sorg­legt er að fólk er jafn­vel að fara úr geir­an­um. Það er aga­legt því við höf­um ekki það mikið af geisla­fræðing­um og þetta er al­gjör sóun.“

Óskar Reyk­dals­son, fram­kvæmda­stjóri rann­sókn­ar­sviðs, seg­ir að upp­runa­lega hafi 21 sagt upp störf­um en að þrír hafi dregið upp­sagn­ir sín­ar til baka. Þrjár eða fjór­ar upp­sagn­ir muni síðan koma til fram­kvæmda um næstu mánaðar­mót að óbreyttu en að von­ast sé til að þeir og flest­ir hinna 18 sem hætta í dag muni draga upp­sagn­irn­ar til baka: \"Þetta þýðir að við munum þurfa að fara í sumarleyfisgórinn. það verður auðvitað mjög erfitt,\" segir hann við mbl.is.

Hann segir augljóst að breyta þurfi vinnufyrirkomulagi á spítalanum til að bregðast við ástandinu:\"Ég geri mér ekki grein fyr­ir því hvort ástandið verði betra eða verra [en í verk­fall­inu] en von­andi kem­ur ekki til þess, von­andi dreg­ur fólk upp­sagn­ir sín­ar til baka.“