Alþýðusamband Íslands samþykkti í dag tillögur Efnahags-, skatta- og atvinnumálanefndar sambandsins um breytingar á skattkerfinu. Markmið breytinganna er að létta byrðum af fólki með lágar tekjur og millitekjur, auka jafnrétti og koma á sanngjarnri skattheimtu. Þetta kemur fram í fréttatilkynningu frá ASÍ.
Tillögurnar eru eftirfarandi:
Skattkerfið:
- Þrepaskipt skattkerfi með fjórum skattþrepum
- Fjórða þrepið verði hátekjuþrep
- Skattleysismörk hækki og fylgi launaþróun
- Breytingin auki ráðstöfunartekjur mest hjá þeim sem hafa laun undir 500.000 kr. á mánuði
Húsnæðisstuðningur:
- Endurreisa þarf húsnæðisstuðningskerfin
- Koma þarf í veg fyrir að sveiflur á markaði hafi áhrif á stuðninginn og þar með afkomu launafólks
Barnabætur:
- Barnabætur nái til þorra barnafjölskyldna
- Dregið verulega úr tekjuskerðingum
- Tekjuskerðingarmörk hækki og fylgi launaþróun
Í tilkynningunni segir að til að mæta tillögunum geti hið opinbera horft til nokkurra mögulegra tekjuöflunarleiða, svo sem hækkunar fjármagnstekjuskatts sem eykur samræmi í skattlagningu launa og fjármagns, upptöku auðlegðarskatts og aukins skattaeftirlits.
Skattbyrði hinna tekjulægstu hækkað mest
Samkvæmt rannsókn hagdeildar ASÍ frá 2017 hefur skattbyrði hinna tekjulægstu hækkað mest á undanförnum árum og dregið hefur úr jöfnunarhlutverki skattkerfisins. Samkvæmt rannsókninni munar þar mestu um að skattleysismörk hafa ekki fylgt launaþróun og vaxta- og barnabótakerfin hafa markvisst verið veikt og eru nú í skötulíki miðað við það sem áður var.
Í tilkynningunni segir einnig að húsnæðisstuðningur hins opinbera hafi rýrnað á sama tíma og fasteigna- og leiguverð hefur rokið upp. „Á síðustu árum hefur barnafjölskyldum sem fá stuðning í gegnum barnabótakerfið fækkað mikið og bæturnar sem hlutfall af launum lækkað verulega. Stuðningskerfin nýtast nú aðeins fámennum hópi mjög tekjulágra einstaklinga. Þau eru ekki lengur það tekjujöfnunartæki sem lagt var upp með vegna vaxandi tekjuskerðinga. Þessu vill Alþýðusambandið breyta og leggur því fram hugmyndir um breytingar á skattkerfinu sem auka jöfnuð og ráðstöfunartekjur megin þorra launafólks.“
