Árni Guðmundsson, framkvæmdastjóri Gildis – lífeyrissjóðs, hætti við að mæta á fund með trúnaðarmönnum og stjórn Eflingar eftir að hann komst að því hver yrði fundarstjóri fundarins. Tilefni fundarins var að ræða Init-málið, sem Kveikur ljóstraði upp um fyrr á þessu ári. Kom þá í ljós að hundruð milljóna króna hafði streymt út úr félaginu Init sem sá um rekstur á tölvukerfi fyrir lífeyrissjóðina.
Fram kom í umfjöllun Kveiks að Gildi hafi greitt Init 620 milljónir króna fyrir þjónustuna á fjórum árum. Enginn hjá Gildi vildi ræða málið en sendu yfirlýsingu um að lífeyrissjóðurinn hafi í áraraðir reynt að minnka umsvifin.
Árni var búinn að samþykkja að mæta en hætti snarlega við þegar hann frétti að fundarstjórinn væri Aðalsteinn Kjartansson, sem var einn blaðamanna Kveiks sem fletti ofan af Init.
Árni sendi Kjarnanum skrifleg svör:
„Nálgun forsvarsmanna Eflingar á viðfangsefninu og fyrirkomulag fundarins var með þeim hætti að það var að mínu mati ekki ásættanlegt,“ skrifar Árni.
Var hann spurður hvort ákvörðunin hafði eitthvað með Aðalstein að gera:
„Eins og fram kom í fyrra svari mínu þá var það nálgun Eflingarforystunnar á efninu og heildarumgjörð fundarins sem var ástæða þess að ég hafnaði því að mæta. Taldi síðan að það væri eðlilegra að fjalla um málið á sjóðfélagafundi þar sem allir sjóðfélagar Gildis fengju upplýsingar um málið og gætu spurt.“
