Hafnfirðingurinn og áhrifavaldurinn Arnar Gauti Arnarsson, best þekktur sem Lil Curly, segir að hann og Birgitta Líf Björnsdóttir, eigandi Bankastræti Club, séu ekki kærustupar. Hávær orðrómur hefur verið um það í samfélaginu síðustu vikur að þau séu saman og hafi jafnvel íhugað að opinbera sambandið.
Lil Curly ræddi þetta í nýjasta þætti hlaðvarpsins BLÖkastið. Hann segist vera á lausu. Hann vildi þó ekki ræða hvort þau væru að hittast. „Birgitta er geggjuð, hún er meistari,“ sagði hann um vinkonu sína.
Arnar Gauti var í viðtali við Fréttablaðið nýverið þar sem hann útskýrði viðurnefnið. „Krullurnar í hári mínu koma frá mömmu minni sætu, Ólöfu Baldursdóttur, en Lil Curly-nafnið ákvað ég að nota upp á djókið þegar ég stofnaði TikTok-aðgang. Verst var að notendanafnið lilcurly var frátekið á einhverjum óvirkum aðgangi, svo ég heiti lilcurlyhaha á TikTok,“ sagði Arnar Gauti, sem er með yfir 100 þúsund fylgjendur í Bandaríkjunum.
