Þorsteinn Pálsson fyrrverandi forsætisráðherra og einn frummælenda á borgarafundinum Aukinn kaupmáttur sem haldinn var í Iðnó í gærdag sagði samingstilboðin sem nú lægju á borðinu varhugaverð, viturlegt væri nú að semja til skamms tíma og nota tímann til að ákveða næstu skref.
Borgarafundurinn var haldinn í tilefni af þeirri hörðu kjaradeilu sem nú skreppir samfélagið í harðan hnút. Ari Skúlason var einnig með framsögu á fundinum og sagði það gömul sannindi og ný að háar nafnlaunahækkanir sköpuðu ekki mesta kaupmáttinn, heldur væri það hæg þróun upp á við sem skilaði jafnan mestum árangri. Það sannaði okkar eigin reynsla og annarra. Gengisfelling fylgdi jafnan háum launahækkunum fyrr á árum en slíkt væri ekki í myndinni nú. Núna kæmu áhrifin fram í verðhækkunum og mögulega minni vinnuaflsnotkun."
Ari sagði enn fremur: "Í hruninu var talað um forsendubrest þegar verðtryggðar skuldir heimilanna hækkuðu. Allir vita að miklar launahækkanir skapa verðbólga sem hækkar verðtryggð lán. En núna, í þetta skiptið, er ekki hægt að tala um forsendubrest vegna þess að allir vita hvert við erum að stefna. Spurningin er frekar sú hvort einhver ætli að bæta tjónið.“
Á fundinum var bent á að stýrivextir gætu hækkað um 2% við boðaða samninga, sem væri alls ekki óraunhæft, en það myndi þýða 25 þúsund króna viðbótargreiðslu á mánuði fyrir fimmtán milljóna króna óverðtryggt lán. Ef vaxtahækkunin yrði 3% myndi það þýða 37 þúsund króna aukagreiðslu á mánuði fyrir venjulegt fólk sem tæki af því stærstum hluta launahækkunarinnar.
Og svo þetta; ef 15 milljóna króna lán er verðtryggt, muni 8% verðbólga hafa það í för með sér að lánið hækki um 1,2 milljónir króna fyrsta árið og 1,3 milljónir á því næsta.
