Arðgreiðslur til eigenda sjávarútvegsfélaga námu í heildina 13,5 milljörðum króna á árinu 2014 og jukust um 1,7 milljarða, eða 14% á milli ára að því er fram kemur í nýrri skýrslu íslandsbanka um sjávarútveginn.
Þar segir jafnframt að arðgreiðslur sem hlutfall af EBITDA, þ.e. afkomu fyrir vaxtagreiðslur, vaxtatekjur, skattgreiðslur og afskriftir, hafi aukist um þrjú prósentustig.
Vitnað er til skýrslunnar í samantekt á mbl.is í dag og kemur þar fram að árleg arðgreiðsla yfir tímabilið frá 2001 til 2014 nemi að meðaltali um 5,4 milljörðum króna en góð arðsemi í greininni hafi skapað svigrúm til aukinna arðgreiðslna undanfarin ár. Hafa beri í huga að arðgreiðslur komi til vegna hagnaðar ársins á undan.
Í skýrslu Íslandsbanka segir að frá innleiðingu kvótakerfisins hafi arðsemi í sjávarútvegi aukist umtalsvert. Samþjöppun óx innan greinarinnar samhliða því að aðgangur að fiskveiðiauðlindinni var takmarkaður og í kjölfarið hefur hagkvæmni í rekstri sjávarútvegsfyrirtækja stóraukist.
Skatttekjur ríkisins af sjávarútvegi hafa almennt aukist samhliða aukinni arðsemi í greininni. Mikil hækkun varð á tekjuskatti á árunum 2012 til 2014 og greiddi sjávarútvegurinn að meðaltali um 7,7 milljarða króna á ári í tekjuskatt yfir tímabilið.
Hins vegar lækkuðu opinber gjöld sjávarútvegsfélaga á síðasta ári og námu um 22,9 milljörðum króna á árinu 2014 og lækkuðu um 1,6 milljarða eða um 6,5% frá árinu á undan, að því er fram kemur í samantekt vefmiðilsins.
