Undirmönnun og skortur á hjúkrunarrýmum eru helstu ástæður alvarlegrar stöðu á bráðamóttöku Landspítalans. Ekki hefur verið brugðist nægjanlega við þeim viðvörunarbjöllum sem hringt hafa og ábendingum stjórnenda og starfsfólks um að öryggi sjúklinga geti verið hætta búin. Þetta er meðal þess sem kemur fram í hlutaúttekt Embættis landlæknis á stöðu bráðamóttökunnar. RÚV.is gerir málinu skil í ítarlegri fréttaskýringu.
Í úttektinni segir að hvorki húsnæði bráðamóttökunnar né mönnun hennar uppfylli reglugerð um faglegar lágmarkskröfur miðað við starfsemina sem þar fer fram. Þá er ekki hægt að uppfylla ýmis lagaákvæði um réttindi sjúklinga við núverandi aðstæður.
Vandinn sem við er að etja sé þess eðlis og af þeirri stærðargráðu að það sé ekki einungis á valdi Landspítalans að bregðast við, sem að mati Embættis landlæknis þolir enga bið, nú væri svo komið að vandinn væri af þeirri stærðargráðu að við þetta ástand verði ekki lengur unað. Ástandið geti skapað jarðveg fyrir óvænt atvik og hættu á frekara brottfalli starfsfólks.
Fram kemur að meðaldvalartími sjúklinga sem bíða eftir innlögn á aðrar deildir Landspítalans hafi lengst verulega, sé nú um 23,3 tímar samanborið við um 16,6 tíma fyrir ári síðan, en æskilegur dvalartími er 6 tímar. Lengsta bið eftir innlögn var 66 tímar þegar úttektin var gerð en dæmi eru um að sjúklingar hafi beðið í meira en 100 tíma eftir innlögn.
Aðstæður sjúklinga eru í of mörgum tilfellum óviðunandi, t.d. þegar skoðun þarf að fara fram á gangi í stað stofu og þegar sjúklingar sem þurfa að vera í einangrun geta það ekki vegna aðstöðuleysis.
Einnig er tekið fram að vistun aldraðra á bráðasjúkrahúsi eftir að meðferð þar lýkur skerði lífsgæði þeirra og er talin áhættusöm fyrir þá, til dæmis vegna hættu á sýkingum.
Þá kemur fram að hver hjúkrunarfræðingur þurfi að sinna of mörgum sjúklingum og að viðvarandi of mikið álag bitni á starfsfólki, t.d. með auknum veikindum þess.
Skýrsluna í heild sinni er að finna á heimasíðu Landlæknis.
