Þorbjörn Þórðarsson, almannatengill, og Arna Bryndís Baldvins McClure, lögmaður Samherja, höfðu aðkomu að pistlum sem Páll Steingrímsson, skipstjóri hjá Samherja, birti undir sínu nafni á vef Vísis. Í pistlum sem Páll hefur birt frá umfjöllun Kveiks og Stundarinnar um meintar mútur og peningaþvætti Samherja í Namibíu kemur hann fyrirtækinu til varnar og gagnrýnir blaðamenn Kveiks og Stundarinnar harðlega.
Í forsíðuumfjöllun Stundarinnar í dag eru birt samskipti sem benda til að Þorbjörn hafi í einhverjum tilfellum hreinlega skrifað pistla Páls eða breytt þeim verulega. Páll mun hafa boðið fram aðstoð sína eftir umfjöllun Kveiks og Stundarinnar í nóvember 2019. Í samskiptunum sem Stundin hefur undir höndum leiðbeinir Þorbjörn Páli hvernig hann þurfi að vista textann sem hann sendi í nýju skjali áður en greinin er send til birtingar til að láta líta út fyrir að skjalið sé frá Páli komið.
Hér má lesa umfjöllun Stundarinnar um málið.
