Áliðnaður stendur nú jafnfætis sjávarútvegi hvað verðmætasköpun í landinu varðar, en breytingin er næsta alger frá því fyrir aldarfjórðungi þegar framleiðsla á áli skilaði fjórfalt minni tekjum en fiskveiðar. Hagnaður annarra fyrirtækja í landinu vegna þessa er gríðarlegur að mati Samáls.
Þetta kemur fram í nýjum gögnum Samáls, samtaka álfyrirtækja í landinu sem eru í veigamiklum atriðum byggð á rannsóknum Hagfræðistofnunar Háskóla Íslands. Þar kemur fram að álframleiðsla var 100 þúsund tonn fyrir alfarfjórðungi, en nemur nú 850 þúsund tonnum ári. Útflutningstekjur af áli á síðasta ári nema 227 milljörðum króna eða um 40% af útflutningsverðmæti okkar Íslendinga.
Ragnar Guðmundsson formaður Samáls leggur áherslu á þá staðreynd að þótt hér á landi séu aðeins rekin þrjú álver þá renni þau stoðum undir starfsemi mikils fjölda smærri fyrirtækja í landinu þar sem framsækni, nýsköpun og hátækni séu leiðarstefin í starfseminni. Það segi sína sögu að árið 2014 keyptu álverin þjónustu af um 700 fyrirtækjum fyrir um 25 milljarða. Í nýrri skýrslu Hagfræðistofnunar komi fram að um 10% af vergri landsframleiðslu verði til vegna þessara fyrirtæka, fyrirtækja í orku-áliðnaði. Ragnar segir þessa virðisaukningu rétt að byrja.
Hann bendir einnig á aðra mikilvæga afleiðingu þessarar þróunar fyrir íslenskt atvinnulíf og raunar íslenskt menntakerfi í heild sinni: "Virkjanir á borð við Kárahnjúka, Hellisheiði- og Reykjanesvirkjun vekja athygli út fyrir landsteinana. Þar er um að ræða flókin verkefni sem hafa tekist gríðarlega vel. Íslenskir jarðhitasérfræðingar eru við störf í Eþíópíu, Mexíkó, Tyrklandi, Kína, Filippseyjum og í raun og veru út um allan heim. Það er þekkingin sem ávannst við virkjanir fyrir álver sem hefur skapað þessi verðmæti," segir Ragnar.
