Í Súrefni – þætti um umhverfismál í kvöld heimsækir Linda Blöndal ISAL, álverið í Straumsvík og Orkustofnun. Hún ræðir við Guðrúnu Þóru Magnúsdóttir, leiðtoga umhverfismála hjá ISAL og Bjarna Má Gylfason, upplýsingafulltrúa ISAL um ál í ljósi umhverfisáhrifa. Þá ræðir Linda við Guðna A. Jóhannesson orkumálastjóra Orkustofnunar, m.a. um orkuskipti, bæði bíla og skipa og útflutning á þekkingu á jarðvarmanýtingu sem Ísland hefur sinnt til margra ára og Orkustofnun þar verið í lykilhlutverki.
Ál er órjúfanlegt daglegu lífi manna. Matar-og drykkjaumbúðir eru úr áli, búnaður í rafeindatæki og snjallsíma, bifreiðar og flugvélar, búsáhöld, byggingarefni - og svona mætti lengi telja – og álið sem framleitt er í Straumsvík er meðal annars notað í framleiðslu Audi bifreiða, en 90 prósent áls sem notað er til að framleiða bíla almennt er endurunnið. Ál hefur verið fjöldaframleitt í rétt rúmlega 100 ár og á Íslandi síðan 1969.
ISAL er eins og þekkt er hluti af Rio Tinto, einum stærsta álframleiðanda heims sem framleiðir tæplega 4 milljónir tonna af áli á ári. Þar af nemur framleiðsla ISAL um 211 þúsund tonnum. ISAL framleiðir um 578 tonn af áli á dag, allt árið um kring og hefur vaktað áhrif álversins á umhverfið í meira en 45 ár. Fyrirtækið er með eina minnstu losun gróðurhúsalofttegunda innan áliðnaðar heimsins.
Álið er endalaust hægt að endurvinna. Á Íslandi einkennist álframleiðsla af afurð sem er til þess fallin að minnka umhverfisáhrif framleiðslunnar. Álið er mun léttara en aðrir málmar, t.d. þrisvar sinnum léttara en stál, og gegnir lykilhlutverki í rafvæðingu bíla alls staðar.
Orkustofnun heyrir undir ferðamála- iðnaðar og viðskiptaráðherra og hefur víðtækar skyldur í orku- og auðlindamálum Íslands – og í alþjóðlegu samstarfi í stórum erlendum verkefnum sem snúast um bætt lífskjör í þróunarlöndum. Auk þess sinnir Orkustofnun þátttöku okkar í alþjóðlegu vísindasamstarfi með orkuauðlindir.
