Þorsteinn Pálsson metur það svo í nýjasta pistli sínum á Hringbraut að niðurstaða væntanlegrar þjóðaratkvæðagreiðslu um veru Breta í Evrópusambandinu muni hafa mikil áhrif á vilja og stefnu Íslendinga í þeim efnum. Haldi Bretar áfram í ESB skapi það þrýsting á Íslandi að ganga í sambandið.
Hann segir að þjóðaratkvæðagreiðsla Breta um ESB í júní, sem meiri líkur en minni eru á að verði haldin, kalli á mikið uppgjör sem muni hafa mikil áhrif um alla Evrópu: \"Af sjálfu leiðir að hún mun snerta Ísland og Norðurlönd öll,\" skrifar þessi reynslumikli og virti stjórnmálamaður til áratuga á Íslandi og bætir því við að fari svo að Bretar gangi úr sambandinu muni það veikja bæði þá og meginlandsþjóðirnar hvort sem litið er til viðskipta eða stjórnmálalegra áhrifa: \"Fastlega má líka gera ráð fyrir að þessi niðurstaða mun víða efla popúlistahreyfingar gegn Evrópusamvinnunni.\"
Ákveði breska þjóðin á hinn bóginn að halda samvinnunni áfram muni það styrkja Evrópusambandið verulega á mjög svo viðsjárverðum tímum, en hér skal því skotið inn í skrif Þorsteins að fylgiskannanir í Bretlandi sýna ítrekað að all traustur meirihluti er sem stendur fyrir áframhaldandi veru í ESB: \"Í þessu samhengi er rétt að rifja upp að Ísland hefur jafnan fylgt Norðurlöndum eða meirihluta þeirra bæði í efnahagslegri og pólitískri samvinnu. Þannig var Ísland í þeim meirihluta Norðurlanda sem gekk í Atlantshafsbandalagið á sínum tíma,\" skrifar Þorsteinn og minnir líka á að eftir nokkurra ára umþóttun fylgdi Ísland síðan Norðurlöndum inn í Fríverslunarsamtökin þar sem Bretar voru í byrjun hryggjarstykkið.
Ísland fór síðan með öðrum Norðurlöndum inn í evrópska efnahagssvæðið, en kaus svo að sitja eftir þar með Norðmönnum þegar meirihluti Norðurlanda fékk í beinu framhaldi fulla aðild að Evrópusambandinu.
Ákvörðun Breta í sumar mun hafa áhrif á ESB-samvinnu Norðurlanda að mati Þorsteins. Ákveði þau að fylgja Bretum út úr sambandinu komi fyllilega til álita að Ísland skipi sér í sveit með þeim í einhvers konar efnahagsblokk í anda EES, en verði Bretar áfram í ESB er að mati Þorsteins útilokað að norrænu Evrópusambandslöndin hugsi sér til hreyfings: \"Við þær aðstæður er líklegt að spurningin um fulla aðild Íslands verði enn áleitnari en verið hefur.\"
Niðurstaða Þorsteins er þessi: \"Stóru verkefnin í íslenskri pólitík á næstu árum lúta að margvíslegum kerfisbreytingum til að ná sömu framleiðni og Norðurlönd. Takmarkið með þeim er að tryggja atvinnulífinu sambærilegt frelsi í gjaldeyrisviðskiptum og Norðurlönd njóta og launafólki sambærileg lífskjör og jafn öflugt velferðarkerfi. Til að nálgast þessi markmið þarf Ísland að færa sig nær því efnahagslega umhverfi sem Norðurlönd búa við. Það verður torsóttara með því að standa í sömu sporum of lengi.\"
