Franska lögreglan hefur gert áhlaup á yfir 150 staði þar sem talið er að öfgafullir íslamistar haldi sig frá því á föstudagskvöldið. Varað er við því að von sé á frekari árásum og hefur fjölmörgum viðburðum í tengslum við loftlagsráðstefnuna verið aflýst.
Forsætisráðherra Frakklands, Manuel Valls, varar við því að í undirbúningi séu fleiri árásir, ekki bara í Frakklandi ehdlur víðar í Evrópu á næstunni, að því er fram kemur í frétt á mbl.is í dag um framkvæmd neyðarlaganna í Frakklandi.
Samkvæmt heimildum AFP, sem miðillinn vitnar til, var lagt hald á vopnabúr í Lyon en franska lögreglan gerði áhlaup á nokkra tugi staða í nótt, þar á meðal í úthverfi Parísar, Bobigny. Þrettán húsleitir voru gerðar í borginni Lyon. Að minnsta kosti fimm voru handteknir og heilt vopnabúr haldlagt. Þar á meðal eldflug, Kalashnikov riffill, skothelt vesti, skammbyssur og fleiri vopn.
Í fréttinni segir að einnig hafi verið leitað í húsum í Toulouse þar sem þrír voru handteknir. Í Grenoble voru sex handteknir hið minnsta og lagt hald á vopn og reiðufé.
Þar sem neyðarástand ríkir í landinu þá hefur lögregla auknar heimildir til aðgerða, svo sem til að handtaka fólk og halda því án ákæru.
