Íbúar á Vestur- og Norðurlandi geta tekið fram stuttbuxurnar og sandalana því veðrið á eftir að leika við þá um helgina ef spá Veðurstofunnar gengur eftir, en hún gerir ráð yfir 20 stiga hita á þessum slóðum og léttum himni.
Spáð er 8 til 20 stiga hita á landinu í dag. Hlýjast verður sem fyrr segir á Vestur og Norðurlandi. Á morgun er spáð 14 til 21 stigs hita. Á höfuðborgarsvæðinu má búast við því að léttskýjað verði í dag en að þykkni heldur upp með kvöldinu. Hiti verður 8 til 15 stig.
Von er á nokkrum hlýindum vestanlands og norðan í dag og næstu daga. Nokkuð sólríkt verður og má reikna með að hitinn á þessum slóðum verði 19 til 21 stig. Annars staðar á landinu er búist við 8 til 13 stiga hita á morgun. Búast má við vætu sunnan- og austanlands.
Veðurstofan varar við því að vindhraði í hviðum geti farið í 25 til 30 m/s undir Eyjafjöllum, í Mýrdal og Öræfum fram á kvöld. Getur akstur með aftanívagna því verið varhugaverður. Það dregur smám saman úr vindi í kvöld.
