„Hvers vegna eru kjörin hér lakari en á Norðurlöndunum,“ spyr Þorsteinn Pálsson fyrrverandi formaður Sjálfstæðisflokksins og forsætisráðherra í nýjum pistli sínum á hringbraut.is og segir svarið vera einfalt: „Framleiðni atvinnulífsins er miklu minni hér en þar. Þetta eiga menn erfitt með að viðurkenna. Enn þyngra er að fá umræðu um þennan veikleika,“ skrifar Þorsteinn og bætir við. „Og þyngst ætlar að reynast að fá menn til að leggja á ráðin um úrbætur.“
Þorsteinn segir að þessa bresti í íslensku efnahagskerfi hafi vinstri stjórnin sett í nefnd á síðasta kjörtímabili; ný stjórn telji greinilega að þar eigi hún best heima. Hann segir að þótt núverandi ríkisstjórn taki vinstri stjórninni fram að því leyti að draga ekki markvisst úr framleiðni atvinnulífsins þá hafi hún ekki sett framleiðnimarkmið á dagskrá; hagvöxturinn nú byggist mest á ferðaþjónustu sem sé láglaunagrein sem ekki leysi vandann um ónóga framleiðni.
Fyrverandi formaður Sjálfstæðisflokksins kallar eftir nýrri efnahagsáætlun í pistli sínum, ekkert bóli á henni þrátt fyrir ítrekaðar óskir aðila vinnumarkaðar. Ástæðuna telur Þorsteinn lúta að þröngsýni í peningamálum: „Ríkisstjórnin þarf að sýna meiri víðsýni og sveigjanleika til að geta átt samtöl við vinnumarkaðinn um þau efni.“ Og síðar skrifar Þorsteinn: „Það er afturhaldssemi í gjaldmiðilsmálum sem nú kemur í veg fyrir að ríkisstjórnin geti lagt fram heildstæða efnahagsáætlun til nokkurra ára,“ og vill Þorsteinn meina að svo rækilega sé bundið fyrir augu síns gamla flokks í þessum efnum að hann sé tilbúinn að beygja af leið síðasta landsfundar.
„Land sem ekki hefur gjaldgenga mynt verðu seint samkeppnishæft um lífskjör. Það var kjarninn í boðskap landsfundar Sjálfstæðisflokksins,“ skrifar Þorsteinn Pálsson undir lok pistils síns hér á hringbraut.is.
Lestu pistil Þorsteins Pálssonar hér:
