Áform tryggingafélaga enda með ósköpum

Þrjú tryggingafélög í Kauphöll Íslands; Sjóvá, Vís og Tryggingamiðstöðin, hyggjast greiða hluthöfum sínum 9,6 milljarða króna í arð. Samanlagður hagnaður þeirra var 5,6 milljarðar á síðasta ári. Teitur Atlason, varaformaður Neytendasamtakanna, segir þetta geta endað með hvelli: „Þetta eru ekkert venjulegar arðgreiðslur, þær eru hærri en hagnaður síðasta árs. Hvað segir það þér. Þeir eru að fara að seilast í bótasjóðina. Manstu hvernig það fór síðast þegar eigendur tryggingafélaganna voru að mixa í bótasjóðunum. Það endaði með hvelli. Ef við stígum ekki á bremsurnar, almenningur í landinu, þá mun þetta bara endurtaka sig. Við erum að horfa upp á þetta aftur og aftur. Við vitum nákvæmlega hvar þessi saga endar. Þetta endar með ósköpum,“ sagði Teitur í viðtali í Morgunútvarpinu.

Teitur telur víst að Neytendasamtökin, FÍB og verkalýðsfélögin eigi eftir að beita sér saman gegn þessum áformum. Tryggingafélög eigi að vinna með neytendum en ekki á móti.