Á fundi Stjórnskipunar- og eftirlitsnefndar Alþingis í dag var samþykkt að hefja frumkvæðisrannsókn á verklagi ráðherra. Er það gert vegna ábendinga framkvæmdahóps FATF vegna aðgerða gegn peningaþvætti og fjármögnun hryðjuverka. Þetta kemur fram á vef mbl.is en Jón Steindór Valdimarsson, þingmaður Viðreisnar og flutningsmaður tillögunnar staðfesti þetta. Var tillagan tekin til efnismeðferðar nú í morgun. Jón Steindór sagði:
„Þetta var samþykkt og það var samstaða í nefndinni um að ráðast í þetta og það er mjög gott.“
Þórhildur Sunna Ævarsdóttir, þingmaður Pírata sagði við vef mbl.is á mánudaginn:
„Það liggur fyrir að við erum komin á gráan lista FATF og höfum verið að fá athugasemdir frá þessari nefnd frá árinu 2006 og hugur nefndarinnar stendur til að skoða hvernig það gat gerst að við erum komin á þennan gráa lista og hvernig verklag ráðherra hefði mátt betur fara svo við getum lært af þessu í framtíðinni.“
Markmið með rannsókninni er að leiða í ljós hvaða brotalamir megi mögulega finna í vinnubrögðum þeirra ráðherra, ráðuneyta og stofnana sem bera ábyrgð á samskiptum við FATF. Í tillögunni segir:
„Mikilvægt er að draga lærdóm af málinu og greina hvað fór úrskeiðis og hverjir bera ábyrgð á því. Aðeins þannig er hægt að draga úr líkum þess að ágallar í verklagi, ábyrgð, úrvinnslu og eftirfylgni í málum af þessu tagi geti endurtekið sig.“ Þá segir jafnframt að lokinni gagnavinnslu muni frekari rannsókn hefjast en stefnt er að því að ljúka vinnu á næstu mánuðum. Í tillögunni segir:
„Lagt er til að SEN afli allra þeirra gagna sem nefndin telur nauðsynleg til þess að rannsaka málið og kalla til sín alla þá gesti sem hún telur að geti varpað ljósi á málavöxtu. Það gildir um ráðherra, ráðuneyti, stofnanir og aðra sem komið hafa að málinu með einhverjum hætti.“
