Forráðamenn lyfjafyrirtækisins Actavis tilkynntu í dag þá ákvörðun sína að færa framleiðslu lyfjaverksmiðjunnar á Íslandi til útlanda, en fyrirtækið rekur nokkrar verksmiðjur erlendis. Um 300 manns vinna í verksmiðjunni. Þetta er sagt vera gert í hagræðingarskyni.
Í tilkynningu frá Actavis segir að flutningurinn sé liður í því að tryggja samkeppnishæfni fyrirtækisins á alþjóðavettvangi. Engar breytingar séu fyrirhugaðar á starfseminni á næstunni og muni þessi ákvörðun ekki hafa áhrif á störf hjá framleiðslueiningunni á Íslandi að svo stöddu en fyrstu breytinga fari að gæta í árslok 2016 þegar fyrstu áfangar í flutningi framleiðslunnar hefjist. Gert sé ráð fyrir að starfsemi verksmiðjunnar á Íslandi verði lögð niður um mitt ár 2017.
Um 300 starfsmenn hafa sinnt framleiðslunni hér á landi, en um 400 manns munu áfram starfa hjá Actavis á Íslandi á öðrum sviðum félagsins.
Önnur starfsemi á Íslandi verður óbreytt, að því er segir í tilkynningunni en hérlendis er fjölbreytt alþjóðleg starfsemi, m.a. á sviði lyfjaþróunar fyrir alþjóðamarkaði, skráningarsvið sem ber ábyrgð á skráningum og viðhaldi markaðsleyfa út um allan heim, alþjóðlegt gæðasvið og fjármálasvið, auk sölu- og markaðssviðs sem sinnir Íslandsmarkaði, sem og ýmis stoðsvið.
Þá eru hér á landi höfuðstöðvar Medis, dótturfélags fyrirtækisins, sem selur lyf og lyfjahugvit Actavis til annarra lyfjafyrirtækja. Um það bil 300 starfsmenn eru hjá framleiðslueiningunni á Íslandi en um það bil 400 starfsmenn í öðrum einingum fyrirtækisins hér á landi.
