Ráðgert er að verja rúmum átta milljörðum króna sérstaklega til loftslagsmála á árunum 2020-2024 samkvæmt fjármálaáætlun ríkisstjórnarinnar. Áætlað er að verja sömu upphæð, rúmum átta milljörðum króna, til verkefna tengdum náttúruvernd og sjálfbærri nýtingu lands. Þá verður 500 milljónum króna varið til eflingu hringrásarhagkerfisins á sama tímabili.
Frá þessu er greint í fréttatilkynningu frá umhverfis- og auðlindaráðuneytinu.
Í tilkynningunni kemur fram að meðal markmiða fjárveitinga til loftslagsmála sé að tryggja að unnið sé að því að uppfylla þær skuldbindingar sem Ísland hefur undirgengist í loftslagsmálum á alþjóðavettvangi og því markmiði ríkisstjórnarinnar að Ísland verði kolefnishlutlaust árið 2040. Fjármagninu sé þannig m.a. ætlað að stuðla að og flýta orkuskiptum í samgöngum, auka kolefnisbindingu með frekara umfangi uppgræðslu, endurheimt vistkerfa og nýskógrækt, og stuðla að nýsköpun og fræðslu.
Þá segir að fjármunum til náttúruverndar verði annars vegar varið til að halda álagi áfangastaða vegna ágangs ferðamanna á náttúruverndarsvæðum innan þolmarka, m.a. með uppbyggingu viðeigandi innviða og landvörslu. Hins vegar sé þeim ætlað að fylgja eftir áformum stjórnvalda um að friðlýsa um 50 náttúruverndarsvæði á næstu fimm árum. Þar er meðtalin stofnun þjóðgarðs á miðhálendi Íslands eins og kveðið er á um í sáttmála ríkisstjórnarinnar.
Að lokum er greint frá því að samkvæmt fjármálaáætlun verður 100 milljónum króna varið árlega til hringrásarhagkerfisins næstu fimm árin. Er áhersla lögð á aðgerðir sem ýta undir ábyrga framleiðslu og neyslu, bætta nýtingu, endurnýtingu og endurvinnslu sem mun draga verulega úr myndun úrgangs frá því sem nú er.
