Rífur helmingur þátttakenda í nýjustu skoðanakönnun Maskínu lýsti sig fremur eða mjög hlynnta Borgarlínunni, eða 52,5%. 24,8% lýstu sig fremur eða mjög andvíg Borgarlínunni og 22,7% voru í meðallagi hlynnt eða andvíg Borgarlínu.
en hún er samstarfsverkefni allra sveitarfélaganna á höfuðborgarsvæðinu um betri almenningssamgöngur á helstu samgönguásum svæðisins.
Skoðanakönnunin sýnir að ekki er einhugur um Borgarlínuna, en hún er samstarfsverkefni allra sveitarfélaganna á höfuðborgarsvæðinu um betri almenningssamgöngur á helstu samgönguásum svæðisins.
Stuðningur við þessa samgönguleið er afar misjafn milli flokka; þeir sem segjast myndu kjósa Flokk fólksins, Miðflokkinn og Sjálfstæðisflokkinn eru neikvæðastir í garð Borgarlínu, en á bilinu 46,1-49,9% þeirra segjast andvígir Borgarlínu.
Meirihluti þeirra sem segjast ætla að kjósa aðra flokka eru jákvæðir gagnvart Borgarlínu. Yfir 80% þeirra sem myndu kjósa Samfylkinguna og Pírata segjast hlynntir Borgarlínunni.
Tæp 34% karla lýsa sig andvíga, en einungis 15,3% kvenna. Þá virðist ungt fólk mun hlynntara Borgarlínunni en þeir sem eldri eru, en yfir 60% þátttakenda á aldrinum 18-39 ára lýstu sig hlynnta Borgarlínunni. Borgarlínan nýtur minnst stuðnings á meðal fólks á aldrinum 50-59 ára, en 41,5% þátttakenda á þeim aldri lýstu sig hlynnta.
Reykvíkingar eru hlynntari Borgarlínunni en íbúar í nágrannasveitarfélögum borgarinnar. 59,9% Reykvíkinga segjast hlynnt Borgarlínu en 49,3% íbúa nágrannasveitarfélaganna eru á hennar bandi.
