Viðhorf Íslendinga til erlends vinnuafls er jákvæðara en gengur og gerist á meðal ríkustu þjóða heims. 60% Íslendinga taka jákvæða afstöðu til erlends vinnuafls, en 21% hafa neikvætt viðhorf til þess, en sambærilegar meðaltölur fyrir allar þjóðir er 57% jákvætt á móts við 32% neikvætt.
Þetta kemur fram í nýjum þjóðarpúlsi Gallup, en sambærileg könnun var gerð í 69 löndum. Í 42 þeirra telja fleiri neikvætt en jákvætt fyrir land sitt að fá erlent vinnuafl til landsins á meðan fleiri telja það jákvætt en neikvætt í 27 þeirra.
Niðurstöðurnar benda til þess að gróflega megi skipta heiminum í 3 hluta; fátækar þjóðir þar sem meirihluti telur jákvætt að fá erlent vinnuafl til landsins, milliríkar þjóðir þar sem meirihluti telur neikvætt að fá erlent vinnuafl til landsins og ríkar þjóðir sem sumar telja almennt neikvætt að fá erlent vinnuafl til landsins og sumar telja það almennt jákvætt.
Meðal 18 fátækustu þjóða könnunarinnar eru aðeins þrjár þar sem fleiri telja neikvætt en jákvætt að fá erlent vinnuafl til landsins. Meðal milliríkra þjóða eru aftur á móti aðeins þrjár þar sem fleiri telja jákvætt en neikvætt að fá erlent vinnuafl til landsins, en fleiri telja það neikvætt en jákvætt hjá 31 þeirra. Meðal 17 ríkustu þjóða heims eru skoðanir skiptari, en hjá níu þeirra telja fleiri jákvætt en neikvætt að fá erlent vinnuafl til landsins en hjá átta þeirra fleiri neikvætt en jákvætt.
Á heimsvísu er munur á viðhorfi fólks til erlends vinnuafls eftir aldri. Þannig er jákvæðnistuðull fólks yngra en 35 ára 30 stig en stuðull fólks eldra en 55 ára er 15 stig á kvarðanum –100 til 100.
Þegar einstök svæði í heiminum eru skoðuð mælist neikvæðni gagnvart erlendu vinnuafli mest í löndum Evrópusambandsins þar sem stuðullinn er -21.
