Dagur B. Eggertsson, borgarstjóri kynnir nú drög að húsnæðisáætlun á borgarstjórnarfundi. Margvísleg uppbyggingu húsnæðis í borginni til næstu ára eru á yfirliti sem er kynnt á fundinum - og áður á blaðamannafundi í Reykjavík.
Reykjavíkurborg leggur 59 milljarða til fjárfestinga, húsnæðisstuðnings og sérstakra búsetuúrræða næstu fimm árin.
Þá kemur meðal annars fram að byggingasvæði fyrir meira en 2500 íbúðir eru á framkvæmdastigi. Um 4000 íbúðir séu í formlegu skipulagsferli, auk þess sem svæði fyrir tæplega 10 þúsund íbúðir eru í þróun.
Einnig verður áhersla á samstarf við byggingafélög um að reisa íbúðir án hagnaðarsjónarmiða. Um 3700 staðfest áform eru til staðar um leigu eða búsetréttaríbúðir fyrir stúdenta, eldri borgara og fjölskyldur með lægri og millitekjur. Af því verði þúsund íbúðir byggðar í samstarfi við verkalýðshreyfinguna.
Áhersla verður á félagslega blönduð hverfi, segir í annars viðamiklu yfirliti um uppbygingu húsnæðis sem nú er til kynningar í Ráðhúsinu.
Í húsnæðisáætluninni eru töluleg markmið um þann fjölda íbúða sem þurfa að fara í uppbyggingu til lengri og skemmri tíma. Þá eru skilgreind helstu byggingarsvæði í Reykjavík og hvernig uppbyggingu íbúðahúsnæðis sem Reykjavíkurborg beitir sér sérstaklega fyrir verður háttað í samvinnu við verkalýðshreyfinguna, húsnæðissamvinnufélög, samtök eldri borgara, stúdenta og einkaaðila, auk eigin leigufélags borgarinnar, Félagsbústaða
