"Það hefur varla verið nokkuð venjulegt við veðrið þennan veturinn," segir Jónas Guðmundsson verkefnastjóri hjá Slysavarnafélaginu Landsbjörg, en hann man varla eftir öðrum eins fjölda af mannfrekum verkefnum hjá sveitunum og það sem af er vetri. Jónas er gestur þáttarins Lífsstíls á Hringbraut í kvöld en þar ræðir hann við Sigmund Erni um aukinn straum ferðafólks upp um fjöll og firnindi og hvort það ætti að leggja fram tryggingu eins og þekkist víða áður en lagt er út í óvissuna. Jónas telur það ekki ráðlegt; alltof margir sem lentu í óförum myndu hreinlega ekki tíma því að kalla á eftir aðstoð og hætta lífi sínu enn frekar en ella vegna þessa. Meginatriði væri að tilkynna för sína og ferðatilhögun og vera með réttan fjarskiptabúnað, en einnig yrði að fara að loka svæðum vegna óveðurs með mun markvissari hætti en nú er gert. Hann gagnrýnir stjórnvöld fyrir seinagang í þeim efnum, þar þurfi að taka rækilega til hendinni.
Björgunarsveitirnar fá um 2500 beiðnir um aðstoð frá ferðafólki á hverju ári. Kostnaður vegna þessarar þjónustu sé vart undir hálfum milljarði króna, "en við látum þó kostnaðinn aldrei hindra okkur í okkar störfum," áréttar Jónas. Erfiðustu stöku björgunaraðgerðirnar, t.d. uppi á stærstu jöklum í aftakaveðri, þegar virkja þarf mikinn fjölda sveita, geta þó hæglega kostað tugi milljóna króna.
Um 3000 björgunarsveitarmenn í yfir 90 sveitum eru í útkallsteymi Slysavarnafélagsins Landsbjargar, en félagsmenn eru um 10 þúsund. Sveitirnar er að finna hringinn í kringum landið, sumar hverjar í mjög fámennum byggðarlögum - og þar eru gjarnan, að sögn Jónasar, allir sem vettlingi geta valdið skráðir í sveitina og nefnir sem dæmi björgunarsveitina Kára í Öræfum. "Þar eru allir alltaf á vakt," segir Jónas.
