Tíðarfar ársins 2015 var óhagstætt lengi framan af. Veturinn var óvenju umhleypingasamur, illviðri tíð og úrkomur miklar. Oft urðu umtalsverðar samgöngutruflanir og foktjón varð í nokkrum illviðranna.
Þetta kemur fram í samantekt Veðurstofu Íslands á veðurlagi síðasta árs, en þar segir að mest hafi kveðið að sunnanveðri sem gerði þann 14. mars, en síðari hluta vetrarins hafi tíð skánað nokkuð um landið austanvert.
Í kringum sumarmál skipti um veðurlag. Norðlægar áttir urðu nær einráðar með kulda og mjög óhagstæðri tíð um landið norðan- og austanvert. Sömuleiðis var kalt syðra, en tíð þó talin skárri. Snjóa leysti seint. Heldur hlýnaði þegar á leið sumarið, en tíð hélst samt óhagstæð nyrðra og eystra með miklum úrkomum, syðra varð veður mun skaplegra.
Mánuðirnir september til nóvember urðu þeir hagstæðustu á árinu. Nokkuð úrkomusamt var syðra en norðaustan- og austanlands var talin hagstæð tíð. Í lok nóvember snjóaði óvenjumikið um landið suðvestanvert og varð desember heldur skakviðrasamur. Mikið illviðri gerði þann 7. til 8. og og varð víða mikið foktjón. Annað illviðri gerði í lok ársins.
Árið var það kaldasta á öldinni, hingað til, en þó var hiti víðast hvar í rúmu meðallagi áranna 1961 til 1990. Árið í heild var úrkomusamt um meginhluta landsins og hefur úrkoma t.d. ekki mælst jafnmikil í Reykjavík frá árinu 2007.
Meðalhiti í Reykjavík var 4,5 stig og er það 0,2 stigum ofan meðallags áranna 1961 til 1990. Er þetta 20. árið í röð með hita yfir meðallagi. Í Stykkishólmi var ársmeðalhitinn 4,1 stig, 0,6 stigum yfir meðallagi og á Akureyri 3,8 stig, einnig 0,6 stigum yfir meðallagi. Á Stórhöfða í Vestmannaeyjum var meðalhiti ársins 4,8 stig og er það í meðallagi. Allar þessar tölur eru birtar með fyrirvara um lítilsháttar hnik þegar athuganir verða endanlega gerðar upp.
rið var úrkomusamt. Úrkoma í Reykjavík var meira en fjórðung umfram meðallag, komst yfir 1000 mm í fyrsta sinn frá 2007. Einnig var úrkomusamt fyrir norðan en þó ekki eins og í fyrra (2014).
Sólskinsstundir mældust um 120 fleiri í Reykjavík en að meðaltali 1961 til 1990. Sólarlítið var aftur á móti á Akureyri; þar mældust sólskinsstundirnar um 150 færri en í meðalári og hafa ekki mælst jafnfáar síðan 2002.
Dæmið snýst algerlega við þegar horft er yfir jörðina alla. Árið 2015 var nefnilega langheitasta árið á jörðinni frá því mælingar hófust, samkvæmt úttekt NASA og Sjávar- og loftslagsstofnunar Bandaríkjanna, NOAA. Þetta er í fjórða sinn sem hitamet er sett á þessari öld.
Samkvæmt gögnum stofnananna var meðalhiti síðasta árs 0,9 gráðum yfir meðalhita á tuttugustu öldinni. 2015 sló þar með met ársins á undan þegar meðalhiti var 0,16 gráðum yfir meðaltali tuttugusta aldar. Gögn frá breskum stofnunum staðfestu niðurstöður þeirra bandarísku.
Veðurfyrirbærið El Niño á einhverja sök á metinu, en vísindamenn segja að mannanna verk eigi langmesta sök, þá helst brennsla jarðefnaeldsneytis að sögn Reuters fréttastofunnar.
