Á árinu sem nú er að líða féllu 22 dómar í heimilisofbeldismálum hjá héraðsdómstólum landsins; 20 enduðu með sakfellingu og tveir enduðu með sýknu. Bæði ákærum og sakfellingum fyrir brot í nánu sambandi hefur fjölgað mikið á undanförnum árum. Breytt verklag lögreglu, nýtt ákvæði í hegningarlögum og aukin umræða í samfélaginu eru meðal þeirra þátta sem hafa stuðlað að því. Vísir.is greinir frá.
Í frétt Vísis kemur fram að með breyttu verklagi sem tekið var upp árið 2014 hafi verið byrjað að rannsaka öll mál, en áður rötuðu ekki öll mál inn á borð til rannsóknarlögreglu. Samkvæmt hinu nýja verklagi komi útkallsdeild almennu lögreglunnar fyrst á vettvang, ástandið er metið og hvort einhver brot hafi átt sér stað; ofbeldi, hótanir eða eignaspjöll. Ef það reynist niðurstaðan er kallaður til rannsóknarlögreglumaður og tekin skýrsla af geranda óháð því hvort brotaþoli vilji kæra eður ei.
Öll ofbeldismál fara þó í rannsókn og að lokum til ákærusviðs þar sem ákvörðun er tekin um kæru. Ef börn búa á heimilinu er félagsþjónusta og barnavernd kölluð til. Þetta er á meðal þess sem Sigrún Jónasdóttir rannsóknarlögreglumaður tekur fram í samtali við Vísi.
Einnig kemur fram að þann 5. apríl árið 2016 hafi tekið gildi nýtt ákvæði hegningarlaga þar sem heimilisofbeldi væri sérstaklega skilgreint. Ekki eru til tölur um fjölda ákæra fyrir árið 2016 en árið 2017 voru gefnar út átján ákærur hjá lögreglunni á höfuðborgarsvæðinu vegna brota gegn ákvæðinu og 21 á þessu ári vegna 28 brota.
Sigrún talar um að aukin umræða hafi hjálpað: „Ég hugsa að fólk sé orðið meðvitaðra í dag um að líta ekki undan. Þegar verklaginu var breytt var það kynnt mjög vel og ég hugsa að það hafi líka hjálpað til; aukin umræða um heimilisofbeldi“, segir Sigrún við Vísi.
