Fjármálakreppan á Íslandi árið 2008 var gríðarlega umfangsmikil og hafði mikil efnahagsleg áhrif. Hún var hins vegar ekki fyrsta fjármálakreppan sem skollið hefur á hér á landi. Á síðustu einni og hálfri öld hafa orðið yfir tuttugu fjármálakreppur hér á landi af ólíkum tegundum. Þetta segir í málfundarboði Seðlabanka Íslands um sögu fjármálakreppa í lífi landsmanna frá 1875, en málþingið verður haldið í Sölvhóli, byggingu Seðlabanka Íslands við kalkofnsveg klukkan 15.00 á morgun.
Í tilkynningunni segir að kreppurnar hafi gjarnan fylgst að. Hægt sé að bera kennsl á sex stórar og „fjölþættar“ fjármálakreppur sem skollið hafi á á u.þ.b. fimmtán ára fresti. Frekari greining á þessum sex stóru kreppum sýni svo ekki verður um villst að þegar kemur að fjármálakreppum þá geti Íslendingar sagt - og raunar kannski ekki með stolti, en sagt það samt: "Við höfum við séð þetta allt áður“.
Niðurstöður sérfræðinga bankans sýna að efnahagssamdráttur í kjölfar fjármálakreppa er að jafnaði um tvöfalt dýpri og varir hátt í tvöfalt lengur en í kjölfar hefðbundins efnahagssamdráttar. Þær benda einnig til þess að fimm af þessum sex fjármálakreppum eiga sér skýra samsvörun í alþjóðlegum fjármálakreppum sem skollið hafa á á sama tíma og að tvö- til þrefalt meiri hætta er á fjármálakreppu hér á landi á tímum alvarlegrar alþjóðlegrar fjármálakreppu.
Frummælandi verður Þórarinn G. Pétursson, aðalhagfræðingur Seðlabanka Íslands en auk hans hafa þeir Bjarni G. Einarsson, Kristófer Gunnlaugsson og Þorvarður Tjörvi Ólafsson unnið að rannsókninni.
