Á fréttavef ruv.is segir að í greinargerð með þingsályktunartillögu þingmannanna sé vísað til þess að staðfesting samningsins hafi verið umdeild á sínum tíma. Þar segi að enn séu skiptar skoðanir um árangur af þátttöku Íslands í EES-samtarfinu. „Enginn vafi leikur á að samningurinn markaði þáttaskil, enda er hann viðamesti samningur sem Ísland hefur gert á alþjóðavettvangi og snertir flest svið íslensks samfélags. Þá hefur samningurinn haft djúpstæð áhrif á samfélagsþróun á Íslandi,“ segir í greinargerðinni.
Flutningsmenn tillögunnar segja að full ástæða sé til að meta á hlutlægan hátt kosti og galla EES-samtarfsins, ekki síst í ljósi þeirrar reynslu sem Íslendingar hafa öðlast á þeim tíma. Að auki sé skynsamlegt að bregða birtu á áskoranir sem blasi við í framhaldinu, einkum vegna útgöngu Breta úr Evrópusambandinu. Hún kallar á að Íslendingar þurfa að endurskoða viðskiptatengsl sín við Bretland.
Í greinargerðinni er vísað til skýrslu sem tekin var saman í Noregi eftir tveggja áratuga reynslu af EES-samstarfi. Niðurstaðan þar hafi verið sú að enginn milliríkjasamningur hefði haft jafn djúpstæð áhrif á norska samfélagsþróun og EES-samningurinn. Þá hafi vaknað alvarlegar spurningar um skort á lýðræði og afsal á fullveldi Noregs, segja flutningsmenn.
