Tólf þúsund Íslendingar hafa lýst sig reiðubúna til að veita aðstoð við að taka á móti flóttamönnum hér á landi. Framtakið hefur vakið athygli erlendra fjölmiðla og er meðal annars fjallað um Facebook síðuna Kæra Eygló Harðar – Sýrland kallar í blöðum á borð við Telegraph, Time og Independent.
Það er rithöfundurinn Bryndís Björgvinsdóttir sem stofnaði Facebooksíðuna á sunnudagskvöld og eftir það hafa streymt inn skráningar þar sem fólk lýsir því hvernig það er reiðubúið að veita flóttamönnum aðstoð og um leið er ríkisstjórn Íslands hvött til þess að taka móti fleiri flóttamönnum en þeim 50 sem stefnt er að veita hæli hér á landi í ár. Talið er að 14 af 22 milljónum íbúa Sýrlands séu á vergangi, þar af tvær milljónir sem eru í búðum í Tyrklandi og ein milljón í Líbanon. Þá er ótalinn sá fjöldi sem hefur reynt að komast landleiðina eða sjóleiðina yfir til Evrópu.
Ríkisstjórn Íslands fundar í dag og verða meðal annars málefni flóttafólks til umræðu á fundinum.
Að því er fram kemur í Morgunblaðinu í dag hafa yfir sjö hundruð manns skráð sig til sjálfboðaliðastarfa hjá Rauða krossinum til að aðstoða flóttafólk við komuna hingað til lands.
Í blaðinu kemur fram að ríft er er frá því að Rauði krossinn tók að sér réttindagæslu fyrir hælisleitendur. Á þessu eina ári hafa 220 manns sótt um hæli á Íslandi. Á því ári fengu 12 einstaklingar alþjóðlega vernd á Íslandi.
Fólkið sem hingað hefur leitað er af 39 ólíkum þjóðernum. Langflestir sem hingað hafa leitað eru frá Albaníu en á eftir kemur fólk frá Makedóníu, Sýrlandi, Úkraínu og Írak.
„Nú í ágústmánuði hafa 32 einstaklingar sótt um vernd en aldrei áður hafa umsækjendurnir verið jafn margir í einum mánuði - sem er þó ekki enn liðinn.
Fólk getur því rétt ímyndað sér að skjólstæðingar Rauða krossins meðal hælisleitenda skipta tugum á hverjum gefnum tíma. Mikilvægt er að hlúa vel að því fólki sem kemur hingað úr mjög erfiðum og andlega krefjandi aðstæðum. Þar getur þú lagt okkur lið, með því að taka þátt í félagslegum verkefnum með hælisleitendum,“ segir á vef Rauða krossins.
