Á bilinu 100-200 starfsmenn fiskvinnslufyrirtækja hafa slasast ár hvert undanfarna áratugi. Algengustu slysin eru skurðarslys en alvarlegustu slysin verða við fiskvinnslutæki sem eru ekki með réttum frágangi. Þetta kemur fram í nýjasta tölublaði Fiskifrétta.
Kristinn Tómasson, yfirlæknir Vinnueftirlitsins, segir í samtali við Fiskifréttir þetta vera staðreynd þrátt fyrir að fiskvinnsla sé atvinnugrein sem hafi búið við miklar tækniframfarir. „Þróun véla og búnaðar býður upp á það að hanna burt slysahættu og skapa umhverfi sem er síður til þess fallið að valda tjóni á starfsmönnum. Þetta er skipulögð starfsemi sem þarf að skila vöru í háum gæðaflokki sem er með því besta í veröldinni. Þess vegna hefði mátt ætla að þegar ferlar eru þróaðir til framleiðslu á slíkri vöru að hægt væri að hanna þá þannig að vinnuumhverfið sé öruggt,“ segir Kristinn.
Kristinn segir það verkefni Vinnueftirlitsins að stuðla að því að fiskvinnslan sjálf sem starfsgrein líti á það sem gæðastimpil að draga úr vinnuslysum. Tjón sem skapast af þeim getur verið umtalsvert vegna t.d. rekstrarstöðvana í kringum fiskvinnslutæki, veikindaleyfi og forföll starfsmanns og nýs starfsmanns sem þarfnast þjálfunar. Hann segir skilning og áhuga ríkja hjá fyrirtækjum í fiskvinnslu um að þessir hluti eigi að vera í lagi.
Kristinn segir að öryggismenning sem hefur orðið til í gegnum Slysavarnaskóla sjómanna sé til fyrirmyndar, þar sem sjómenn komist ekki á sjó nema þeir búi yfir þekkingu á öryggismálum. „Þetta vekur upp þá spurningu hvort óhjákvæmilegt sé að bjóða starfsfólki upp á sérstaka kennslu í öryggismálum eins og sjómenn sækja. Fiskvinnslan er hröð með hættulegum tækjum sem þurfa ávallt að vera rétt uppsett. Það er mikilvægt að starfsmaðurinn þekki tækin og hættuna sem getur stafað af þeim. Um leið þarf að hanna og ganga frá tækjunum með þeim hætti að slysahættan sé hönnuð burt,“ segir Kristinn einnig við Fiskifréttir.
