Sparisjóðurinn hefur tilkynnt að hann viðskiptavinir hans geti ekki millifært eða greitt til erlendra aðila eftir 6. desember næstkomandi. Ekki verður þá hægt að móttaka greiðslur eða millifærslur frá erlendum aðilum eftir 13. desember. Það sama gildir um millifærslur á erlendum gjaldmiðli milli banka innanlands þar sem þær greiðslur fara í gegnum erlenda greiðslumiðlun. Kvika banki hefur verið í samstarfi við sparisjóðina vegna erlendra greiðslumiðlunar fyrir en sagði nýlega upp samstarfinu vegna kröfu mótaðila bankans erlendis.
Viðskiptavinir sparisjóðsins fengu bréf þessa efnis nýlega en sparisjóðurinn segist vera að leita að langtímalausn vegna erlendra millifærslna. Alls starfa fjórir sparisjóðir undir merkjum Sparisjóðsins hér á landi. Sparisjóður Austurlands, Sparisjóður S-Þingeyinga, Sparisjóður Strandamanna og Sparisjóður Höfðhverfinga.
Í samtali við Kjarnann segir Árni Björnsson, framkvæmdastjóri Sambands íslenskra sparisjóða, að leitað hafi verið annarra skammtímalausna eftir að þjónustuaðili þeirra, Kvika banki, sagði upp samstarfinu en því miður hafi það ekki gengið eftir. Hann ítrekar þó að þetta hafi ekki áhrif á notkun greiðslukorta sjóðanna, hvorki innanlands né erlendis.
Magnús Ingi Einarsson, framkvæmdastjóri bankasviðs innan Kviku banka, segir í samtali við Kjarnann að bankinn hafi þurft að segja upp samstarfinu við sparisjóðina vegna breytts fyrirkomulags evru-greiðslna í Evrópu eða svokallaðra SEPA-greiðslna. Undir því fyrirkomulagi sé ekki heimilt að framkvæma greiðslur fyrir óbeinan aðila.